السلام عليكم و رحمة الله و بركاته
أهلا بيكم يا بورصجية المنتدى
أحب أوضحلكم البورصة حسب إللى أنا شوفته فيها و لسه بشوفه
البورصة مش محتاجه الكلام الكبير إللى بيتقال عليها و الخساير إللى الناس بتتكلم عليها
لأن الخساير بتبقى نتيجة لأخطاء الجهلة أو التسرع فى أخد قرار أو التواطؤ فى أخد قرار أو الطمع
البورصة هيا لعب بالأعصاب علشان كده يا ريت إللى يدخلها يكون قلبه جامد
فى أسهم داخل مقصورة زى هيرمس و كابو و العربية لحلج الأقطان و أسهم تانيه و دى إسمها داخل المقصورة علشان علشان دى أسهم مقيدة أساسيا فى بورصة القاهرة و الإسكندرية و بتبقى ماشية صح عن طريق تقديم قوايم مالية أو عقد جمعيات غير عادية موثقة
يعنى من الأخر ماشية فى الشغل السليم و بتبقى شركة ناجحة ماتتعيبش
و فى بقى خارج المقصورة زى لكح جروب و إيه أى سى و الخليج للإستثمار و أسهم تانية
و إسمها خارج المقصورة علشان دى الشركات بتاعة الأسهم ماقدمتش قوايم ماليه صحيحة أو تكون خسرت أو أى شئ تانى
بس مش معنى كده إن الواحد يخاف من الأسهم دى
هيا برضه بتعمل مصلحة
زى سهم إنترناشونال إلكترونكس من 4 أيام عمل 8 جنيه فى الجلسة..كان بـ 17.90 وصل لـ26
و تانى يوم عمل 30 جنيه
يعنى إللى كان عنده توقع بطلوع السهم و إشترى فيه ده بقى يبقى حظه حلو
إنما إللى إشترو فى العالى على أساس إنه هايجيب 50 جنيه فدول إللى لبسو العمة من البورصة
المفروض مايسموش البورصة البورصة المصرية..يسموها بورصة إنت و حظك
لأنك بتشترى السهم مابتعرفش هايروح فين أو مصير الجريمة إللى إنت عملتها إيه
البورصة يا جماعه عاوزه واحد يلاعبها و تلاعبه
ليه..علشان تقدر تطلع منها بمصلحة
كل مستثمر فى البورصة بيلعب على حدود فلوسه
يعنى كل شخص يقرر إنه هايروح البورصة يحدد المبلغ و بعد كده يرسم دايره حوالين نفسه الدايرة دى بتحتوى على عدة أسهم
لو داخل بمبلغ كبير بما فوق الـ100000 يبقى ده الدايرة بتاعته واسعة شوية
مابين 10 أو 11 سهم يلعب بيهم
لأن الشخص إللى بيدور على المضاربة أو المكسب اليومى لازم يشترى أكتر من سهم
علشان يعمل توازن لأنه لو إشترى سهم واحد هايكون قلبه ماشى مع سهم واحد
السهم يطلع يسيبه يمكن يعلى أكتر
السهم ينزل يستناه لما يطلع
علشان كده بيشترى أكتر من سهم علشان لو سهم طلع يبيعه و لو سهم نزل يستنى عليه
إنما إللى عاوز يعين فلوسه يبقى يحاول يشترى فى سهم رخيص و يبحث فى شركته يشوف مستقبليا الشركة دى هاتعمل شغل و أرباح كويسة ولا لأ
مش يروح يشترى فى سهم عالى على أساس إنه هايطلع و بعد كده يروح فى داهية
ده بالنسبة للناس إللى معاهم أكتر من 100000
أما بالنسبة للى معاهم تحت 100000 لحد 1000 جنيه
دول بقى كل واحد دايرته بتضيق
يعنى إللى معاه 1000 جنيه يروح يشترى سهم أو سهمين
ينصص فلوسه
و يركنه
لأنه مش هايضمن إن الألف جنيه تجيبله مبلغ كل يوم أو كل إٍسبوع أو كل شهر
لحد بقى 5000 جنتيه دى بقى إللى ممكن تجيبله فى الإسبوع 200 أو 300 جنيه حد أدنى لو هو شخص ذكى
و يبدأ يلعب بالبورصة و هيا تلعب معاه
دلوقتى الشخص إللى داخل جديد
مش عارف يعمل إيه خايف يتسرع و خايف تفوته فرصة
يروح يعمل كود فى أى شركة سمسرة و الكود لما يطلع يحط فلوسه و يسحب عقد من البنك إللى هايحفظله فلوسه
و يبدأ يشتغل بس هو مش عارف يشترى إيه
الأول ياخد إسبوع يتعلم فيه يعرف الأسعار
يسأل ده و ده
يعرف من ده و من ده
يبدأ يجمع معلومات
بس لما أى شخص يقولله إشترى فى سهم معين يبقى نسمع منه المعلومة و نفوتها
لأنه مافيش شخص يقدر يعرف السهم ده هايروح فين
كلها بتبقى توقعات و بنحطلها نسبة 99 و 9 من عشرة فى المية إنها مش هاتتحقق
و لو إتحققت يبقى خير و بركه
لما تبدأ تشتغل
تحط عينك على الأسهم المشهورة خصوصا لو لاقيتها مش بتعمل مصلحة
يعنى كل يوم بيزيد زيادات رمزية صغيرة و بيقل بطريقة قليلة
ده تعرف إنه هايطلع طلعة فى مرة واحده
السهم إللى تلاقيه بيطلع بيطلع و بطريقة غريبة و تلاقيه صفر عروض و عمال يطلع و يكون نزل عليه الخبر ماتشتريش فيه لأنه خلاص بيكون عمل عملته السودة
الذكاء إن الشخص يجيب الخبر من قبل نزوله
حتى لو نزلت إشاعة بتعمل مصلحه حلوة
أى كلمة عن أى سهم بتخلى الناس تندفع وراه و لما الناس بتندفع السهم بيزيد
فى ناس بتعتقد إن الشركة هيا إللى بتحط أسعار السهم
لكن ده جهل
المستثمرين هما إللى بيعملو الأسعار من حيث التداول على السهم
أهم حاجه المستثمر الجديد يركز عليها هيا العروض و الطلبات و كمية أقل عرض و أعلى طلب
و شاشة تنفيذات السوق مهمة جدا جدا جدا
لأن التلات حاجات دول أهم من القايمة بتاعة سعر السهم نفسها
لأن ممكن يكون شخص عارض على تمن كبير و شخص طالب على تمن قليل
إذن السعر المكتوب فى القايمة مالوش لازمة
المهم أنا تعبت من الكتابة
و فى حلقات تانية و نصايح هاقولهالكم كتير بس على مهلكم عليا
فى توقعات شخصية منى على الأسهم إللى هاتزيد
سهم أوراسكوم للتنمية و الفنادق ده هايعمل شغل حلو فى أول إسبوع فى رمضان
سهم كابو نفس الكلام هايجيب ال3 جنيه بس الله و أعلم هايجيبها إمتى
سهم راية و الأهلى للتنمية هايعملو شغل حلو
فودافون
شركة الإتصالات الجديدة إللى نازلة فى شهر إتنين السنة الجاية أنا هاشترى فيها بكل فلوسى
سهم بنك إسكندرية لسه مانزلش هاينزل بخمسة جنيه و هايعلى علو جامد علشان هايخصخصوه
سهم كريدي أجريكول لما يتقسم يوم 30 سبتمبر هايعمل شغل حلو و هايطلع تانى
سهم القابضه الكويتيه هايجيب 3 دولار بس الله أعلم إمتى
يعنى إللى معاه فلوس و عاوز يركنها يركنها
سهم بنك فيصل بعد تقسيمه وصل ل7 دولار و هايعمل شغل
سهم الكابلات المصرية هايعمل شغل
و أسهم تانية كتير توقعاتى فيها ماتخرش المية بس انا مش هاقولهالكم دلوقتى على كل مرة أكتب موضوع هاقولكم بشوية
و زى ماقلتلكم التوقعات مابتحصلش بنسبة 99.9%
بس توقعاتى أنا بتتنفذ بنسبة 60 %
و كل سنة و إنتم طيبين بمناسبة شهر رمضان الكريم
و يعود علينا و عليكم بالخير يا رب
و يا ريت تفتكرونى بالخير
و يا ريت تردو على الموضوع المتعب ده و أى واحد عاوز يستفسر يكلمنى فى الموضوع و تحياتى لكل الإيجيهاتية إللى فى المنتدى
سلام