فاكر لما لعبت ماتش كورة في المدرسة وخسرت من فريق أولى تاني؟!
فاكر اليوم ده وإنت خارج بره الملعب قلت إيه لـ"أحمد" صاحبك:
يا عم والله احنا الأحق بالفوز.. الحكم كان بيحكم لهم.. وحسب لهم ضربة جزاء ظلم.. والملعب أرضيته كان فيها حفر كتير.. ده حتى الجمهور كان بيشجعهم واحنا لأ!
***
طيب فاكر لما نتيجة سنة تانية جامعة ظهرت ولقيت نفسك شايل 5 مواد في عين العدو؟
فاكر يوميها قلت إيه لـ"أحمد" اللي لسه صاحبك:
يا عم والله أنا ماستاهلش السقوط.. طيب ده أنا حليت حل مافيش حد قدر يعمله زيي.. ده أنا كتبت كتابة ماحدش كتبها من أيام العصر الحجري.. هو بس الدكتور اللي مستقصدني عشان أنا ناقشته مرة فعرف إني أذكى منه... هي الدنيا كده!
***
طيب فاكر لما خطوبتك مع البنت "سوسن" اتفسخت
فاكر يوميها قلت إيه لـ"أحمد" اللي برضه لسه صاحبك:
يا عم والله هي ماتستحقنيش أصلا.. دي باردة جدا في مشاعرها.. ده أنا كنت باتصل بيها في اليوم 7 مرات وهي ولا هنا.. ده أنا صرفت عليها فلوس في العزومات والخروجات تكفي لسداد ديون مصر.. وبعدين هي أصلا ماكانتش حلوة وكانت شبه العفريت لما يقوم من النوم!
***
طيب مش ملاحظ حاجة في كل الكلام اللي فات ده؟
إنك ملاك بريء وديع رقيق طيب وهادئ ومسالم وعبقري
في حين إن العالم التانية كلهم ولاد......!
ملاحظ صحيح ولا مش ملاحظ!
ملاحظ إنك جبت أسباب خسارة الماتش.. لسوء الملعب وتعصب الحكم والجمهور ضدك وماجبتش سيرة إن الملعب كان سيئ عليك وعلى الفريق المنافس وإن الحكم كان بيحكم بينكم إنتم الاتنين وإن الجمهور بيشجع الفريق اللي بيلعب أحلى... وفوق ده وده ماذكرتش خالص إنك أكيد خسرت عشان لعبت وحش والفريق التاني لعب أحلى!
ده حصل برضه مع خطيبتك.. اللي طلّعت فيها كل القطط الفطسانة والغرقانة وماتصورتش خالص إنك ممكن إنت اللي تكون ماتستحقهاش وإن هي الأحسن منك؟
نفس الكلام لما أرجعت سقوطك في الامتحان.. لأن الدكتور حاطّك في دماغه عشان إنت أذكى منه! ومافكرتش خالص إنك ممكن تكون سقطت عشان ماذاكرتش كويس وإن كل الكلام الكتير اللي كتبته في ورقة الامتحان مالوش علاقة بإجابة السؤال أصلا!
دايما لما بنقع في مشكلة أو كارثة أو مصيبة نبص لبره ونجيب العيوب على حاجات خارجية..
لكن عمرنا ما نتصور إن العيب جوانا..
وإن الحل برضه جوه..
دايما متصورين إن الكون كله متآمر علينا.. وإن الكل يسعى لتأخيرنا عشرات السنوات للخلف..
رغم إنك لو بصيت لنفسك في المراية هتلاقيك هفتان وضعيف ومافيش فيك حيل تهش دبانة!
يبقى ليه الكون يتآمر عليك أصلا!
بس برضه خلينا مانتخيلش إنك ولا حاجة..
وتعال نقر بإنك يعني فيك صحة.. وممكن في يوم من الأيام تبقى ولا "الشحات مبروك" عضلات بقى ونظام.. وتعال نفترض إن فيه ناس -بلاش ناس- فيه دولة -بلاش دولة- فيه دول كل همها إنك تفضل ضعيف وغلبان ومش قادر تفرد طولك..
هتعمل إيه؟
هتقعد طول الليل والنهار تندب حظك وتشتم في الناس دول ولما تيجي تقعد مع "أحمد" -اللي لسه صاحبك وماموتهوش- هتقول له: أصل كلهم متآمرين عليّ!
ولاّ هتقاوم؟
وهتطور من نفسك ومن قدراتك ومن أدائك ومش هتبص خالص لأي حاجة أعداءك بيعملوها..
أو على الأقل مش هتخلي انتصارهم عليك في جولة يخليك تشعر إنك خسرت المعركة كلها؟
كتير منكم هيقول لأ طبعا سأقاوم وسأقاتل وسأحارب
بس الكلام سهل.. المهم إنت هتحول الكلام ده لفعل ازاي؟
ده سؤال -اكتبه عندك عشان ماتنساش تجاوب عليه-
السؤال التاني:
في رأيك ليه أغلبنا بيرجع كل خسائره وانكساراته وهزائمه لنظرية المؤامرة؟
ده من إيه يعني...
حد ناوي يرد علينا..؟
ولا هنتصور إن فيه مؤامرة بقى وماحدش هيرد خالص!