كلكم انتظرتم المفتي وم الاربعاء و في احسن الاحوال اغلبكم
عشان تعرفوا رمضان امتى ؟؟؟؟؟؟؟؟
انا بقا كنت عارفة رمضان امتى من يوم 1/1/2007 و دة اول يوم مسكت فيه نتيجة السنة الجديدة
لاني طبعا اول حاجة بعملها افر النتيجة لحد يوم عيد ميلادي عشان اقرا الكلمتين اللي بيكونوا مكتوبين تحت
و طبعا اشوف رمضان جاي امتى
و لا بستنى مفتي و لا بتاع و لا أي حد اساسا
النتيجة بتقول صح كل سنة - مفيش غير سنة واحدة اللي قالت غلط و طلعت صح في الاخر و كل الناس قالت اننا صمنا رمضان ناقص يوم
يعني لو كنا مشينا على النتيجة كان بقا احسن و كنا صمنا رمضان صح لكن احنا عندنا مع السعودية
مهو مش معقول ميكونلناش رأي خاص بينا و نمشي ورا الدول التانية
و طبعا الدولة المخالفة بردو هي ليبيا عشان ليها شخصيتها المستقلة و اعتقد ان ليبيا صايمة انهاردة
و السعودية السنة دي عملت حاجة غريبة جدا قال ايه راحت تستطلع الهلال يوم 28 شعبان
ازاي يعني يا ناس – هو كدة - بس احنا اتعودنا من السعودية على انها يبقا ليها راي لوحدها و خصوصا و هم عندهم اهم الاماكن الاسلامية المقدسة و الحج حيجي على تحديدهم هما مش احنا حتى لو كنا ساعتها في 8 ذو الحجة حتروح تحج بردو
و بصراحة بقا احنا شعب مدلع جداً و اللي يقول غير كدة يبقا بيتبطر على النعمة
و اخرة البطران قطران
الحكومة حتعمل ايه اكتر من كدة
قدمتلكم الساعه ساعة بحالها عشان متتعبوش
و لسة كمان لما الصيف يدخل شوية شهر شعبان حيبقا 90 يوم علشان رمضان يدخل الشتا و مفيش أي هلال حيظهر خلال ال90 يوم دول
يعني اخر دلع و ترويق
كلنا مستعجلين رمضان يجي عشان دة فعلا احلى شهر في السنة و لما يجي مبنعملش حاجة جديدة مبحسش ان حتى سلوك الناس اتغير و لو حتى جزء بسيط
بل بالعكس دة صيامهم بيكون حجة لسوء سلوكهم و اسهل حاجة عندهم :
سيبني ف يحالي انا صايم و مش طايق نفسي
اما في احسن الاحوال لما يكون الانسان هادي و مؤدب بيقول:
غور من وشي السعادي بدل ما افطر على شوربة زومارة رقبتك
و طبعا كل واحد فينا بيجهز لرمضان بمعرفته و الامثلة المذكورة تنطبق على البعض فمثلا :
ستات البيوت الغلابة كل يوم بتفكر حتعمل ايه على الفطار
ملحوظة الغلابة هنا مش بمعنى فقرا
لان الفقرا مبيفكروش اساسا - مش عشان معندهمش مخ لا سمح الله - لكن معندهمش فلوس يا حول الله
الولاد الصغيرين بيفكروا في الخيم و الخروجات و الحسين ( مش المسجد ) و الذي منه
فريق تاني بيفكر في التليفزيون و المسلسلات و دول اغلبهم بنات
و فيه طبعا نسبة كبيرة جدا بتفكر في الصيام و القيام و التروايح و رمضان بمعناه الكامل
و فيه ناس تانية تستعد بأسألة عجيبة من نوعية ما الحكم في شراء فانوس رمضان للاطفال رغم ان الدين يسر و مش كل حاجة تبقا بدعة و نجري نحرمها
و الحمد لله ان رمضان مشاعر و شعائر
مشاعر حلوة لناس و اسرة كلها بتتلم في المغربية على الفطار في وضع نادرا انه يحصل
و محاولات مضنية لمنع اللسان من الغيبة و النميمة غالبا ما تفشل لكن يكفينا شرف المحاولة
و شعائر من صوم و صلاة و قيام و قرآن و كل شئ جميل
و في النهاية ادعيلكم و اقول
اللهم بلغنا رمضان
واعنا على الصيام والقيام وقراءة القرآن
و لا تنسوا يا كتاكيت صيام 13- 14- 15 رمضان
مع تحياتي
اخوكم فى الرضاعة من نهر النيل
mero