كل سنه وانتوا طيبين يا جماعه العيد خلاص اهو بعد يومين
كنت قاعد مع اصحابى اخر قعده فى رمضان كده بندردش وبنضرب شاى ببقسماط طبعا
المعلم حنفي : يعود عليكوا الايام بخير ويدينا طوله العمر ونقعد قعدتنا دي علي طول
رمزي بيه : والله يا جماعه رمضان عدي بسرعه محسناش بيه
سيد افندي : ا سلام علي رمضان وجمال لياليه والله بنفتقده طول السنه
تيتو : الله العيد خلاص اهو اخيرا حخرج مع المزه البت كانت منشفاها عليا طول رمضان علشان الصيام
المعلم حنفي : شوفوا الحمار بيفكر في ايه واحنا بنقول ايه يارب توب عليا من القعدة مع البني ادم ده في مكان واحد
رمزي بيه : ههههههههههههه والله انت عسل يا معلم حنفي دايما كده لسانك سابقك
سيد افندي : عنده حق يا سيد رمزي ماهو صحيح احنا بنقول في حاجه وده بيقول في حاجه تانيه خالص
انا : متصلوا علي النبي يا جماعه ده احنا في ايام مفترجه ومش عاوزين نزعل من بعض علي كلام فارغ . ايه رايكم نفتح التليفزيون نشوف اي حاجه من بتوع رمضان ؟
المعلم حنفي : لا وانبي يا روءة بلاش قلبة دماغ ده انا مرارتي بتتفقع في رمضان من الهلس ده
رمزي بيه : اه والله عندك حق التليفزيون بيجي رمضان وزي ما يكون بيجيله اسهال يديها في مسلسلات وبرامج هبله تفقع المراره وتعلي الضغط
انا : ههههههههههههههههههه امال الناس تتسلي بايه بس
سيد افندي : بأي حاجه يا اخي هو مفيش غير الهلس
تيتو : ده الواحد بيستني رمضان علشان المسلسلات تقوموا تقولوا هلس
انا : والله السنادي انا شايف الاسهال مكنش شديد اوي القنوات الفضائيه ظبطت الموضوع شويه وفي برامج كويسه كتير ومسلسلات حلوه منها الدالى مثلا
مسلسل عجبني جداااااااا
رمزي بيه : فعلا المسلسل كان ممتاز جداا ونور الشريف عمل دور رائع
المعلم حنفي : انا بقي عجبني خالد صالح فى سلطان الغرام الراجل ده ممثل فوق الرائع
تيتو : لا ناديه الجندى مزه مزه يعني حته جثه انما ايه
سيد افندي : يبني حرام عليك انت مفيش في دماغك غير النسوان انا عن نفسي معجبنيش حاجه بس العيال عندي بيتفرجوا علي تمثليه قضيه راى عام بيقولوا انها حلوه
انا : هههههههههههههه ده مسلسل حلو والله ياعم سيد ويسرا عملت دور حلو اوي بصراحه تتحسد علي المجهود
رمزي بيه : بس اللي غايظني بقي الاعلانات اللي كل شويه تقطع المسلسلات نص المسلسل اعلانات
تيتو : اووووووه ده الاعلانات دي اجمد حاجه بيجيبوا شويه بنات تجنن اه لو الواحد يظبط تلات اربع حتت من دول كنت اعتزلت البنات وكفايه علي كده
انا : علي العموم يا جماعه كل سنه وانتم طيين مش عاوزين نطول علي الناس المرادي خلي كل واحد يشوف اللي وراه هي الناس موراهاش غيرنا بس عاوزين نعرف بقي ايه رايك في اسهال التليفزيون السنادي وايه اللي عجبك ايه اللي معجبكش
وبالمره نعمل استفتاء صغنون
افضل ممثل \ افضل ممثله \ افضل كاتب \ افضل مخرج \ افضل برنامج \ افضل مذيع \ افضل مسلسل
وبالمره بقى
افضل عضو / افضل عضوه/ افضل مشرف/ افضل موضوع
شهر رمضان بس ياجماعه
اتمنى مكنش طولت عليكوا
تحــــــــــــــــياتى