[bimg]http://www.pumpload.com/version2/file.php?id=18796500639473615564708698709592.gif[/bimg]
الخارجية المصرية تستدعي سفير إسرائيل بالقاهرة على خلفية إذاعة تليفزيون إسرائيل فيلماً تسجيلياً عن قتل الجيش الإسرائيلي لأسرى المصريين
[center]
[center]
وتم اللقاء في وزارة الخارجية المصرية كاللقاءات السابقة بالضبط .. تعالوا نشوف
أحمد أبو الغيط : فيه إيه يا سي كوهين؟ كده تفضحونا في تليفزيونكم ؟
كوهين : فضيحة إيه يا أبا الغيط ؟ أصله بيعرف عربي أحسن من أبي الغيط
أبو الغيط : الكلام الفارغ اللي انتم أذعتوه ده عن قتل الأسرى المصريين .. إحنا ناقصين فضايح ؟
كوهين : يا سيد ابو الغيط إحنا عندنا إعلام حر والدولة لا تتدخل فيه
أبو الغيط : طيب يا سيدي عارفين .. وبلاش كل شوية تقطمنا بالكلمتين دول .. ما حنا برضه عندنا الواد ابن الدمرداش كل يوم بيطلع على المحور ويقول ويتكلم براحته
كوهين : يضحك .. يقهقه .. ينسدح للخلف .. قصدك برنامج الساعه ونص ده ؟ جرى إيه يا سيد أبو الغيط ما احنا دافنينه سوا .. ولا نسيت ؟ مش دي قناة اسمه إيه ده بتاعكم بتاع سما العريش اللي مشاركينه في ....ال ال
أبو الغيط مقاطعاً : شوف بقى .. من فضلك ما لكش دعوه بسياستنا الداخلية .. خلينا نرجع لموضوعنا
كوهين : موضوع إيه يا معالي الوزير ؟
أبو الغيط : موضوع الأسرى يا سيدي .. بقى ده كلام ؟ كل ما نقول يا هادي والشعب يبقى في إيدينا زي الملبن تيجوا حضراتكم وتضربوا كرسي ف الكلوب كده ؟
كوهين : والشعب المصري ماله ومال ده يا معالي الوزير ؟
أبو الغيط : انته يا راجل انته حاتجنني ؟ الأسرى دول ولادهم اللي انتم موتوهم دول
كوهين : طيب وإيه يعني يا معالي الوزير ؟ ما حضراتكم موتوا قدهم ألف مرة في المعتقلات والأسفلت والطيارات والعبارات ، كان الشعب حاسبكم يعني ؟
أبو الغيط : دول شعبنا واحنا أحرار فيهم .. ندبحهم نفجرهم .. نعذبهم .. نغرقهم .. نقطعهم حتت ما لكمش دعوه .. دي سياسه داخلية وافتكر انك بتتدخل في سياستنا الداخلية
كوهين : يا معالي الوزير سياسة إيه بس ؟ أنا مش شايف حكاية السياسة اللي انته بتتكلم عليها وفلقت دماغي بيها دي .. روق كده واشرب القهوة بتاعتك
أبو الغيط : شكرا على القهوة يا سيدي .. الله .. يتلعثم أبو الغيط ويتذكر أنه في مكتبه هو وليس في تل أبيب ويحدث نفسه .. جرى إيه يا سي كوهين .. انته في مكتبي أنا ودي قهوتي .. تكونش جاي في التشكيل الوزاري القادم ولا إيه ؟ يادي النيله .. الواد جمال واطي زي أبوه ويعملها والواحد لسه ما ظبطش نفسه بكام مليون
كوهين : مالك ؟ سارح في إيه يا معالي الوزير ؟
أبو الغيط : هاه ؟ لأ ولا حاجه .. دماغي لفت شويه
كوهين : قوم روح يا أبو الغيط وسيبك من الكلام الفاضي ده .. ده بقى تاريخ يا راجل .. وعندنا القانون الإسرائيلي بيسقط التهم دي بالتقادم.
أبو الغيط : أنا ما ليش دعوه بقوانينكم يا كوهين .. وما تنساش إنها من القضايا التي لا تسقط بالتقادم في القانون الدولي ولا نسيت ؟
كوهين غاضباً : ما تنساش نفسك يا أبو الغيط .. أنا لسه ماسك أعصابي معاك .. ويقضم كوهين شفتيه في غضب
أبو الغيط مبتسماً ومريلاً في هبل واضح : فيه إيه يا راجل أنا كنت باهزر معاك ؟ انته برضه صدقت إننا ممكن نوصل الموضوع لمحكمة دوليه ؟ يا راجل عيب ؟ إخص عليك أنا كنت فاكرك ابن نكته وباهزر .. باهزر يا كوكو
كوهين غاضباً : كوكو إيه دي يا أستاذ .. لم نفسك شويه .. والله لولا خالتي كوندي وصتني عليك وقالتلي الولد أبو الغيط ده نمره وييجي منه .. كنت بهدلت أهلك دلوقتي
أبو الغيط مبتسماً ومريلاً برضه : الله .. إلا من حق ازيها كده ؟ وازي كلبها اللولو ؟ انته قابلتها إمته ؟
كوهين : ما تغيرش الموضوع يا أبو الغيط .. إنته أهنتني وده معناه خطير جدا .. ويشير إلى الموبايل قائلا : أنا عملت ميسد كول للزفت بتاعكم اللي باينه خرف وما بقاش يعرف يعين وزرا زي الناس
أبو الغيط مستعطفا : ميسد كول لمين يا كوهين ؟
كوهين : وهو فيه غيره ؟ بتاعكم ده اللي اسمه حسني
أبو الغيط متنهدا في راحة ومحدثا نفسه : الحمد لله .. كنت فاكرك عملت ميسد لخالتك كوندي يا ابن الهرمه
كوهين : بتقول إيه يا أبو الغيط ؟
أبو الغيط : هاه ؟ مين ؟ لأ ولا حاجه .. كنت بادعي في سري لخالتك كوندي ربنا يخليها الست الطيبة دي
كوهين : أنا ماشي .. لكن أحب أفهمك حاجه .. بلاش الأسلوب ده معايا مره تانيه يا أبو الغيط .. فاهم ؟
أبو الغيط : مبلم .. ومتردداً يقول : ممكن أطلب من سعادتك طلب يا كوهين ؟
كوهين : عارفه يا مان .. هتقولي كالعاده إنك راح تطلع تصريحات وشوية همبكه .. مش كده ؟
أبو الغيط مبتسماً ومريلا : ياه .. دايما فاقسني يا كوهين
كوهين يضرب الباب ويخرج بدون أن يمد يده ليد أبو الغيط الممدوده
أبو الغيط يسلم على نفسه وينادي على مدير مكتبه قائلاً : ناديلي العيال بتوع الصحافة يا بني ، ولا أقولك بلاش اتصل بعبدالله كمال وكرم جبر في روزا وأحمد موسى في الأهرام والعيال دي يعني وبلغهم إننا استدعينا السفير الإسرائيلي ..
الموظف : حاضر .. بس سعادتك .. هم زعلانين شويه لأن الباشا المسئول عنهم اتأخر عليهم في الأوبيج بقاله أسبوعين
أبو الغيط : وأنا مالي ؟ هو أنا بتاع المالية ؟ اتصل ليهم بالزفت بتاع الأمن وبلغه إننا محتاجين ليهم أوي الأيام دي وخليه يزود ليهم المعلوم
الموظف : أمرك يا فندم
أبو الغيط : ما تنساش توصي العيال دي تكتب كلام سخن شويه ويبلغوا بيه الصحف التانيه ووكالات الأنباء
الموظف :مفهوم سعادتك
اليوم التالي
المانشيتات الحمرا والخضرا والبحلقي طالعه تلالي بأبو الغيط الهلالي سلامه واللي عمله في سفير إسرائيل .. وسلمولي على مصر سلمولي .. وسمعني سلام الصبوحه
هذه مصر تحت حكم السىء مبارك وعصاباته الأسوء منه .. ولا حد ليه رأي تاني ؟ أو تصور تاني عما دار في مكتب هلفوت الخارجية زفت الطين ملوخية؟
تمخض الجبل فولد فأراً .. قال إيه ؟؟؟!!! نطالب إسرائيل بفتح تحقيق في الوقائع التي فضحوها وفضحونا معاها .. والنبي يا عم أولمرت افتحلنا تحقيق .. سايقين عليك النبي وأهل بيته .. .. طيب سايقين عليك الشيطان وأهله وكل عيلته من هرتزل لبن جوريون لجولدامائير لكوندي وبوش .. افتح والنبي يا عم أي تحقيق كده وخلاص .. إن شالله حتى تكون نتيجة التحقيق أن الأسرى عضوا نفسهم وماتوا من العض مش بإيد أليعازر .. طيب أقولكش يا عم أولمرت .. ممكن إحنا نفتح تحقيق ونبعته ليكم مفتوح جاهز وفيه بأن أليعازر كان مختل عقليا برضه زي ما بنعمل هنا .. أهو نوايه تسند الزير وخلاص ..
رغم يقيننا بأنه لا عدالة دولية ولا بطيخ ولا قرع من ده خالص .. لكن كان واجب برضه من باب الحرص على كرامة ولاد بهيه يتم مخاطبة المحكمة الدولية .. صحيح أنها لن تأتي بأحكام ضد المؤسسين من بني صهيون ومن يدفعون مرتبات أهلها من بني ماسون .. لكن أهو شيء أحسن من لا شيء يا مبارك يا سىء .. لكن تقول إيه بس ؟ ((الله يرحمك يا فنان الشعب محمد طه)) ع الأصل دور .. وده خسيس ندل .. تبرأ من أهله .. اسألوا أهل قريته في المنوفية
.. حسني تجاهل جنازة أباه عمك مبارك كاتب المحكمة الغلبان اللي كل جريمته في حق بلده أنه أنجب لها ذلك القذر .. [/center]
لا لمبارك وعائلته وكل نظامه .. لا للعمالة .. لا للخيانة .. لا لبيع الوطن .. لا لعصابات رجال أعمال مبارك .. لا لنهب الوطن .. يسقط .. يسقط حسني مبارك .. يسقط يسقط
وإيييييييييييييييه ....أنا بكره إسرائيل
وإيييييييييييييييه ....أنا بكره إسرائيل
يا جماعه الموضوع ده مش موجود في اي منتدي تاني لاسباب رقابيه ههههههههههه وياريت يتثبت وأمانه عليكم متنسوش العيش والحلاوه وياريت بسبوسه علشان بموووت فيها....ألحقووووني
