مساء الخير عليكم ..

معرفش ليه دايما بكتب مواضيعى بليل وبتبقى مساء الخير

الظاهر الالهام مبيجيش غير بليل ..

وم هذا المنطق ابدأ موضوعى بتحيه كبيره لصديقتى العزيزه الهام .. مع انى معرفش حد اسمو الهام

بس اكيد هعرف ف يوم م الايام ..

ازيكم واخباركم ايه وهلما جرجر

موضوعى النهارده حساس وحيوى وبيمس طبقات كتير م الشعب المصرى

.
.
.
اننا اليوم نتوجه اليك عزيزى المواطن

(( ياسمسمه ياجامدده ))

.
.
م قلب الاحداث
.
.

ان اان اااان تيشششششش
.
.
القناه الاولى ..

يطلع واد زى العسل بغمازتين (( وهذا شرط اساسى ف الواد طبعا ))

يتحدث الطفل لفنلته مباشرة .. (( وخد بالك م النجطه دى ))

ايه ماما تقدر .. الا تقدر ..

تطلع واحده سبحان الله شتان بينها وبين الواد اللى كان عسل ده .. ايون هو ده

ال ايه .. تحط الفنيله ف الجردل .. ف المسحوق .. وهووووب تنور الفنيله

وتبقى ماما دى سوبر مامااااااااااا
.........................

القناه التانيه ..

تطلع ست ماشاء الله .. ست بجد يعنى مش كده وكده وعليها ملامح السمن البلدى (( واخدلى بالك م النجطه ده برده ))

وتحس م الوهله الاولى انها عندها كل امراض السمنه والكوليستيرول والضغط والسكر والزيت والشاى

بقعه ع بالطو ابنى الدكتور (( بفتح الدال )) ميصحش

وهوب اتحط البالطو ف الغساله الفولتوماتيكى وبقى ناصع نصوع الشمس ف كبدة السماء

وبقى وراء كل رجل عظيم ست مبترضاش بااقل م نضافة اريال
.........................

القناه التالته ..

تطلع واحده ال ايه شعرها كان خفيف لدرجة انها كانت بتلبس الترحه قدام جوزها ف البيت

(( خدلى بالك م النجطه دى برده.. انا عارفه عمال تاخد بالك م الصبح بس خلاص هانت))

اعشاب سوبر اتفوووووو .. الشعر المناسب ف الدماغ المناسب

وهووب بقى شعر السنيوره قد كده ومبقتش تلبس ترحه قدام جوزها ومبقاش فيه ادنى مشكله
.........................

مش هكملكم بقية القنوات اكيد انتم حافظينها كويس

... ايه ده بقى ...

لدرجة دى وسائل النصب والاستخفاف بعقلية الناس

دى مبقتش دعايه واعلان

دى بقت نصب واستهبال

واشى اعلانات عن حبوب بتخن واعشاب بترفع

واحزمه بتشد و اربطه بترخى

وعمليات بتكبر وعمليات بتصغر وعمليات بتشفط ..

ناهيك (( جار ومجرور مرفوع بالكسره )) عن الافكار اللى بتبث عبر هذه الاعلانات

واللى تعتبر الغام موقوته بتتزرع ف دماغ كل حد فينا م غير مياخد بالوو
.
.
الست بتلبس الترحه علشان شعرها بيقع وخفيف ولما بقى فل بقت فل ومبقاش فيها حجاب

يعنى ربط الحجاب بشكل شعرك ... فان كان شعرك ثقيلا ويتميز بقدرات جيده سيدتى فلا داعى للحجاب

وربط الريف بالسيدات السمينات اللى لسه بيلبسوا جلابيه بسوسته تفصيل .. وكأن الريف ف مستنقع اخر

ومش عايزه اقلك تنمية حب العزله والوحده ف الاتفال وبدل مكانوا يخلوه يكلم فنلتووو

كانوا خلوه يكلم صاحبوو مش م قلتهم يعنى ..

وع هذا الاساس ليبتون واللى ع فنجان منو نجح الاخ هو واحمد وعدوا المحيط

وغيرها وغيرها وغيرها ...

مش عارفه انتو حاسيين بالموضوع ده ولا انا بس اللى عندى صراصير ف نفوخى وبكبر كل حاجه

ع كلا يلا علق معايا ع الليله ده م طقطق لسلااحف

بيدايقك الاعلانات وشغل النصب ده ؟؟

ولا بتقول وانا مالى ؟؟ طالما مبشتريش ومبيتنصبش عليا ؟؟

ولو بتضايقك ..

م ناحية ايه .. انها بتقطع عليك سلك افكارك ومتابعتك العظيمه للماتش ولا المزلزل

ولا فعلا بتفهم الافكار والتهميش اللى بيجى م وراها ؟؟

ولا اصلا بقى داققهم ع الباب .. وبتصدق الاعلانات دى اصلا اصلا .. يعنى

يلا قول كلمتك .. وع فكره الموضوع مش هايف

الموضوع باذنك يارب سنتين كمان وهيبقى التلفزيون 17 ساعه اعلانات و 7 ساعات ارسال

وشكرا ليك سواء رديت او مرديتش

سواء قريت او مقريتش

شكرا لمشاركتك ع كل حال ,,

دمتم بالف خير

شكرا على الموضوع الهايل ومعاكى حق الاعلانات بقت مستفزة ورخمة اوى زى اعلانات اريال وبرسيل بينضف الغسيل تحط القميص فى الغسالة يطلع فلة طيب ماهو لازم يعنى هيطلع نضيف واعلانات الزيت والسمنة كلها اكل وحاجات تخلى الواحد يجوع وكمان اعلانات الفيلات والقصور والشقق ام دورين والواحد مش لاقى علبة كبريت يتجوز فيها....بينى وبينك مفيش احلى من اعلانات ميلودى تتحدى الملل

هههههههههههههههههههههههههههههههههههههههههه
هايله والله ياتوته فكره جاده للنقاش فعلا وانا اساسا كنت عايز اتكلم فى موضوع الاعلانات دى والاستخفاف بعقول الناس وكويس انك طرحتى الموضوع لا كله كوم واعلان تانى عجيب ومستفز وبيبوظ اعصابى جدا اول لما اشوفه قال ايه واحده قاعده فى فيلا طويله عريضه وقاعده فى الجنينه بتاعتها وناس مبسوطين جدا واغنيا والفيلا تنفع ملعب كوره بجمهور كمان ويقوم فجاه كده سبحان الله واحد يطلع من الهوا شكله اساسا بيسرح بانابيب بوتجاز مع الاعتذار للى بيسرحوا بالانابيب وتلاقى سيادته لابس بالطو ابيض وعامل فيها تمرجى ويقول للست وهيا بتسقى ابنها كوبايه ميه استنى انتى بتعملى ايه مش تتاكدى اول من ان الميه دى نظيفه تقوله واتاكد ازاى يقوم جاى بقى شكل لفلتر مدفعش فيه اكتر من 1.50 بالكتير ويبدا الدعايه عن هذا المنتج اللى اصلا مش بيعمل اى حاجه وانا واثق من كده لان واحده جارتنا مخها مفوت جابته ومعملش اى حاجه بالعكس بعد شهرين بالظبط يبدا هذا الفلتر بقدرت قادر بتحول لون الميه من الشفاف اللى اللون الاصفر ويرجعوا يقولوا العيب فى المواسير نسيبنا بقى من الوليه جارتنا ونرجع للست المتريشه لما الدعايه عن الميه اللى فى الحنفيه جايبين ناس اغنيه ليه مهو الناس الاغنيه دى ممكن تشرب ميه معدنيه ولا هيا كمان الميه المعدنيه ملوثه بيضحكوا علينا الناس دى ولا بيضحكوا على نفسهم ولا ايه بالظبط شايفنا احنا اللى اغبيه ولا هما اساسا اغبيه ولا ايه النظام دا بجانب بقى الاعلانات الموضه الجديده اللى طالعين فيها اليومين دول على القناه اللى يارب اشوفها ولعه قناه روتانا بقت الاباحه علنى فيها وبيجيبوا اعلان سافل جدا لواحده فتاه ليل ودا المسمى الطبيعى ليها وواحد راجل كبير وشعره ابيض ولابسه الهانم قميص نوم اسود وبيعملوا اعلان للفياجرا انحلال ده ولا حرب علينا ولا ايه بالظبط

الف شكر ياتوته واسف على الاطاله وموضوع هايل جدا جدا

اولا ميرسى لمرورك تانى حاجة انا معاك فى حكاية
اعلانات الشقق الا مح عارف الشش دى فين
بس على فكرة اعلانات ميلودى دى احتراما لريك مستفزة وليها موضوع تانى

على فكرة انا شفت اعلان الفياجرا دة مبقاش فى حياء ولا حاجة اسمها عيب
وكلة كوم واعلان الفلتر دة كوم
ولا الغسالات ولا اعلان المواسير واعلان سيراميكا انا مش عارفة اقول اية

هههههههههههههههههههههههه
اولا تسلم ايدك يا توته هو فعلا بقت حاجه غلسه اوى الاعلانات
ومعاكم كلكم فى اللى قولتوه

على قناه الناس
لقيت بتاع مضمضه لمنع التدخين وكده يعنى المفروض اللى حيشفوه ناس كبار

ساعات اساسا بتبقى تافهه لدرجه مالهاش حد برضه من كام يوم بتفرجحطين طفل صغير على كتف الراجل لابس ابيض وبجنحات وعصايا وشيطان كبير ولم ا الراجل يستخدم
المنتج يروح الشيطان يتبخر والملاك ينتصر
منتهى السذاجه والعبط يعنى لو اعلان بتاع شرب اللبن كانت الاولاد رمت اللبن اصل
وبرضه قناه دريم فيها اعلان بتاع المكنسه وغساله ديو
منتهى البدائيه
بحس انهم مش بيشفوهم قبل ماينزلوهم والمفروض اننا نتفرج قهرا عليهم بحس انهم بيعقبونا علشان بنتابع قنواتهم اصلا

انا مش هقدر اضيف اكتر من كده
بس اصلا عقول الناس راحت منهم بجد من اللى بيحصل
والمشكله ان الناس بتاخد بالكلام ده
يعنى يقولك اعشاب وبتاع ومش عارف ايه
وبردو الناس بتشترى
فى برنامج اسمه بين الناس
مره بتفرج عليه ولاقيت ان واحد مات بسبب الاعشاب دى
يعنى اصلا اعلاناتهم حاجه مش تخش عقل طفل صغير
ادينى فى الهايف وانا احبك ياسكامنس
بجد روعه ياتوتا مواضيعك
الى الامام ديما ياقمر

ههههههههههههههههههههههههههههههههه
موضوع روعة يا توته بجد
وعندك حق في معظم النقط اللي قلتي عليها
بس اصلا السبب ان مفيش اعلام هادف
وكله مش بيدور على الأهداف بل بالعكس
بيدوروا على الربح السريع
بس أكتر اعلان كنت بضحك لما بشوفه هو اعلان بتاع
عباس متأخر على الجامعه وواخدها جرررررررري

لما بيخلع الجاكت اصحابه بيغمى عليهم من العرق