!!البلد عملت مسابقة ملكة جمال البقر ياجدعان
أه والله
والخبر جاى فى كل وكالات الأنباء والصحف.. وجايبين صورة البقرة وهمّا غاسلينها وحاطـّين على شعرها هيد أند شولدرز.. وحاطين جيل على شَعر حواجِبها عشان مايبقاش على الخدود يهفهف ويرجع يطير.. وملمّعين القرنين وعاصرين عليهم لَمُونتين وبكُمّ الجاكتة زى أحمد بدير فى ريا وسكينة
زِرّ زِرّ زِرّ زِرّ ..زَرّ زَرّ زَرّ زَرّ
المسابقة ماشاء الله كان عليها إقبال كتير وده بسبب زيادة أعداد البقر فى البلد بشكل ملحوظ!! وكانت فى التصفيات 120 بقرة بالصلا ع النبى..دُول بقى اللى عدُّوا من اختبارات كشف الهيئة وطول القرْن وجمال الديل.. من الآخر دُول البقر المُزَز بقى
وبدأت تصفيات المسابقة الرهيبة.. وفيه كام بقرة طلعت برّة المسابقة عشان خايفين على نفسهم من تحرّشات الجاموس اللى بيحَكـِّم..ومفيش بقرة شريفة ترضى انها تتكشف وهيّه عريانة قدّام اللى مايسواش واللى مايسواش
وبعد محاولات للوقيعة بين آخر بقرتين.. وبعد أن استخدمت البقرة الفائزة سلاح الإغراء على الجاموس اللى بيحكـِّم.. فازت بقرة أسيوط بالمسابقة وسط تصفيق وتهليل
..وزَّع كاكُولا يا ابو صابر
!!وزغرطى يا ام بَهَانة
الجميل بقى فى الموضوع ده لجنة التحكيم..أيوة ..لجنة التحكيم حضرتك من أسبانيا
يعنى احنا جِبنا تليفون مُحَكّمين من أسبانيا.. واتصلنا بيهم وقلنا لهم: احنا بس عندنا مسابقة ملكة جمال البقر على قدّ ما قـُسُم.. فَضْلة خِيرْكم يعنى .. وعايزينكم تشاركونا الفرحة..وعلى رأى المثل ..خليك بقر يحتار عدوك فيك
وطبعا بقى رفعنا يـُفَط كبيرة احتفالا بالمسابقة وشعار المهرجان:بقرة جميلة ترفع بلاوى كتيرة
وأغنية المهرجان بقى: هيّه البقر كده لييييييييييه.. بقى ليها لون تااانى
طب البقرة اللى فازت علـّقوا لها الميدالية الذهبية فين؟؟ فى قرنها؟؟وللا فْ ديلها باعتباره موطن الإغراء؟؟
طب تعرفوا الجايزة كام؟؟ 5أجولة عَلف..بس علف مَلـَكى بقى.. مش من بتاع البقر التانيين..يعنى مثلا زى ما احنا بناكُل الرغيف اللى بْشِلـِن اللى مايتّاكلش..وغيرنا بياكل فِينو من النضيف.. ليه بقى؟؟؟ عشان همَّا بـَقر
وزيادة عن جايزة العلف..البقرة هتاخد 350 جنيه كاش..يعنى مش هتروح صرَّاف آلى ولا حاجة..هتستلمهم حافِر بحَافـِر من الجاموس اللى بيحكِّم
اوعى حد يفترى على الحكومة ويقول انها أغفلت مناسبة عظيمة زى دى.. يتقطع لسان اللى يقول كده..محافظ أسيوط بنفسه كان متابع المسابقة وهوه اللى أمر بصرف الجايزة.. حكومتنا زى الفل..بتعمل مسابقات وطنية جامدة.. النهاردة البقر ..بُكرة مسابقة أجمل كلبة..وبعد بكرة مسابقة أجمل بُرْص..والجايزة هتبقى شبشب يفرم أمُّه عَ الحيطة
واحد هيسألنى: طب والـ 350 جنيه دول جايين منين؟؟
أقول لحضرتك: دى فلوس موظفين الضرائب العقارية اللى معتصمين فى الشارع من كام يوم
وفلوس الدَّعم اللى عايزين يلغُوه.. وفلوس مصاريف الجامعات اللى زادت كام ضِعف..وفلوس مرتبات مدرّسين شباب مانعين تعيينهم عشان مفيش ميزانية..لا ماتقلقش الحكومة بتتصرف يابا
والبقرة زمانها بتحلم بقى دلوقتى بلقب ملكة جمال بقر العالم..ويمكن تشتغل الفيلم الجاى مع محمد سعد برضُه.. ويجيلها عقود احتراف من كل مزرعة فى العالم
وياسلام بقى وهيه ماشية تتغندر بقى فى أسيوط ولابسة التاج الملكى.. ماشيةالسنيورة كده كده اهُو.. عايزالها صورة.. كده كده اهُو..
ويعملوا الحوافِر بالمونيكير والباديكير..وأكيد برضه هتشرب من الترعة الأول قبل بقية البقر
!!البقرة هتاخد 350 جنيه يا جدعان
!!يعنى ممكن تروح كارفور
مش مهم تشترى إيه.. ان شالله تشترى برسيم من كارفور..أكيد برسيم مغلـّف بقى
بس المهم انها هتروح وخلاص
!!!ناس ولاد شحيبر صحيح
عملت المسابقه دى
اكس هيتس الله يرحمه