من أطلق الرصاص على عم علاء بتاع الفول؟

أنا عايز أعرف بقى فيه كام واحد غَني في مصر؟؟
لا حضرتك.. مش الغِنَى العادي بتاع شغلة محترمة وعربية فيات تمبرا وشقة تمليك بطلوع الروح.ولا بيت تلات تدوار بالعافيه
. أنا اقصد الغِنَى الفاحش بتاع القصور والعربيات اللي اربعة في اربعة يساوي ستاشر وحمامات السباحة والبودي جاردز اللى الواحد فيهم عضلة دِراعُه أتخَن من بطني لما آكل مَحشي
ولا حتي بسبوسه بالقشطه
*******
كام واحد غَنِى في مصر بقى؟؟
حضرتك السؤال ده منطقي جدا بعد الوجبة الدسمة من شلل الاطفال اللي شفناها في مسلسلات رمضان.. والحمد لله كلنا ختمناها وشدِّينا حيلنا كمان في العشر الأواخر
أنا ماشفتش ولا مسلسل بصراحة إلا أول يوم رمضان عشان كنت في بيتنا.. المهم خير اللهم اجعله خير المسلسلات كلها عبارة عن عربيات شيروكي وبودي جاردز وحمامات سباحة ومجوهرات ودهب وياقوت واحمدك يارب
والخلافات كلها ازاي الملياردير ده زعَّل الملياردير التاني.. فالملياردير التانى خسَّر الأولاني كام مليار.. وبعدين اتصالحوا في الآخر وكل ملياردير باس الملياردير التاني من بُقُّه والمسلسل خلص زى الفل
والأخت نادية الجندي.. أخت إيه؟؟؟ نينة نادية الجندي صحفية شريفة أي وعهد الله وبتدافع عن الأخلاق وبتجري ورا الخبر والمستندات والصحف كلها واقفة على رِجْل
أيوة حضرتك فين الكلام ده بقى؟؟ صحفية إيه اللي بتلفّ وتتعب وتتنكَّر وتتقتَل وتتخطَف عشان خبر ولاّ قضية فساد؟؟؟
كنتوا اكتبوا في تِتْر المسلسل بقى هذه الأحداث لا تمت للواقع بصلة وأي تشابه في أرض الواقع يبقى انتوا اللي هُبْل
كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض.. وعدوّ النهاردة حبيب بُكرة.. مادام مرتب رئيس التحرير المعارض بيعَدِّي 35 ألف جنيه شهرياً ده غير نِسْبته من الإعلانات تبقى الحياة زي الفل ومفيش مشاكل ولا فساد
*******
فكَّروني برضُه بأفلام خالد يوسف الأخيرة.. الأبطال كلهم أغنيا بالصلا ع النبي.. حتى البواب عنده هيونداي على قَدُّه.. ورايحين يتفسحوا في شاليه أي واحد فيهم ما كلهم عندهم شاليهات صلوا ع النبي وبعدين مالقوش حاجة يعملوها ولا يفكروا فيها قالوا يللاّ نلعب ويجا.. طب بالله عليكم حدّ كِدَه يقعد جنب موظف راجع من شغله في المترو .. ويقول له: لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك
ولاّ العلاقات بين الجنسين.. دي بقى عايزة قعدة.. أي حد مذكر بيروح بيت أي حد مؤنث..والحد المؤنث عايش في بيت أي حد مذكر.. وطلع بالشيفروليه واحنا قاعدين.. وحَمِّل ع الشيفروليه واحنا قاعدين
ولا الفيلم بتاع خيانه مشروعه ايه اللي شرعها دي يا اخويا مش عارف كل واحده تغلط وبعدين مش عارف تعمل ايه كده وبعدين تروح تتجوز
بلاها جوازه ياراجل مفيش احسن من العزوبيه وقال ايه اخ يقتل اخوه علشان الفلوس في حد كده
في فيلم وسط البلد محمد نجاتي بيقول لهند صبري تعالي معايا الشقة.. هند صبري بكل براءة وطُهْر قالت له: مفيش مشكلة.. أنا اعرف ان الواحدة تروح شقة الواحد تشرب شاي .. تقعد تتكلم شوية.. بس المشكلة ان الناس ممكن يفهموها غلط
طبْ حدّ يجيب كوباية عصير قصب بقى للراجل اللي اتجنَّن ده يااخوانا اللى هوَّه أنا
يعنى الواحدة تروح شقَّة الواحد تشرب شاي.. اتمَنَع الشاي من البلد ما عدا في شقة المحروس؟؟ وانا اللي عامل فيها مابحبِّش الشاي وعُمري ما شربتُه.. دا انا من بكرة هاشترى مخزون شهر من الشاي من جميع الأنواع
*******
فين المسلسلات بتاعتنا احنا؟؟
احنا مش بنشوف الحاجات اللي بتحصل دى ياجدعان.. حد منكم شاف قصور وبودي جاردز وعربيات زي اللى بيحصل مع ابطال المسلسلات دي؟؟
واحدّ منكم شاف التحرُّر الرهيب ده بين أي بنت وولد في الحياة.. وان البنت تروح له البيت عادي؟؟ وبلاش نتكلم اكتر من كده عشان أنا حاطط وشِّي في الأرض دلوقتي
ولو موجود يبقى كام في المِيَّة من سكان مصر المحروسة؟؟
يعنى مش عيب تبقى كل مسلسلات وأفلام مصر عن ناس احنا مانعرفهمش.. أو حتى عن نسبة لا تتجاوز واحد في المية من سكان بلدنا الحبيبة بتاعة مشربتش من نيلها؟؟

فين عربية الفول وساندوتش الكبدة اللي برُبْع جنيه وتذكرة المترو والأتوبيسات الخنقة والموظفين الغلابة اللي فيه فتاوي قالت ان يجوز عليهم الزكاة.. والشباب اللي ع القهاوي؟
فين النت اللى عايزين يحدِّدوه زى النسل وفين مشاكل التأمينات والمعاشات؟
فين مشاكل الميَّة والزِّبالة اللي بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه
فين مشكلة السَكَن والشباب اللي اتجوَّز على روحُه والبنات اللي بتشَمْشِم على عريس
*******
مش هيَّه دي مصر؟؟؟
ولاّ مصر شوية صفقات وقصور وعربيات وبنات ستايل في الجامعة بأحدث موبايلات؟؟
ولا يعني ده عشان نفضل نقول ياريتنا زيّهم.. ونفضفض عن نفسنا شوية
زي إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش في جَوْدة السَّمنة حضرتك.. المشكلة مين اللي هيجيب لك الأصناف دي؟؟ دي الفرخة عندنا بتتقسم على أربع ليالي.. والشوربة بنشرب فيها أسبوع
وتلاقي الست الوالدة جايبة نفس نوع السَّمنة بس الفرخة مش زى اللي في التليفزيون
الفرخة بتاعتنا م الآخر هيه فرخة لينا بتاعة مسرحية المتزوجون
دي مش حياتنا؟؟
يا جماعة يعني واحد زى اللي قتل أمه من كام شهر عشان مش راضية تدّيله تلاتة جنيه ..لو شاف مسلسل زي بتاع نينة نادية الجندى والعيلة كلها عندها عربيات.. يعمل إيه؟؟؟
ولا الست الهام شاهين اللي مفكره انها ممكن تشتري كل حاجه بالفلوس حتي الحب
ومش عارف هي عضلاتها كبرت اوي كده ليه اظاهر بتاخد بودر للحكايه دي
طب صحافة إيه ولا طبّ إيه ولا شغلانة إيه عموما اللي تجيب الفلوس دي كلها؟؟؟ طب حضرتك هما خرِّيجين آداب إنجليزى مش تبع الشغلانات دي يعني؟؟
حتى في الروايات البوليسية تلاقي كلمة السرّ دايما حاجة مش بتاعتنا.. يقول لك مثلاً: الثلوج تذوب دائما في الصيف
يردّ عليه: ماعدا في القطب الشمالى
وانا مالي بالقطب الشمالي ولا الجنوبي؟؟
ليه مَتِبْقاش كلمة السر مثلا: موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر
*******


دوروا احسن عن الناس اللي بتجري ورا لقمة عيشها وبنحاربهم فيه
علي اساس انهم بيشوهوا المنظر الحضاري بتاع بلدنا الحضاريه
وياسلام بقي علي النخوه اللي انتزعت من قلوبنا وكل حاجه غلط بنشوفها نقول ملناش دعوه
وانا مالي ياعم ان شالله الدنيا تخرب
انا ومن بعدي الطوفان زي مابيقول عم علاء بتاع الفول وياسلام بقي علي الفول بتاعه
وعلي راي عم ياسر حبيبي الرجاله هتنقرض زي الديناصورات كده
وكله بيلعب علي كله علي راي الست
ويلا باي بقي علشان الحق اركب الحمار الشيروكي بتاع عم علاء علشان اروح اضرب طبق كشري من عند عم خميس
هذا الاعلان مدفوع مسبقاً

ياااااااااااااااااااااااااااااه
والله عند حق فى كل كلمة ياهوبا

تسلم إيدك ياصحبى على التوبيك الروعة ده
بالتوفيـــق ياصحبى
دمت بخير

ميرسي يا عم ليدو نورتني يا جميل
تحياتي لك

موضوع جميل اوى يا ايهاب وينضاف لسلسلة موضوعاتك المهمة
بصراحة من اكتر المواضيع المهمة اللى قريتها ومن كتر حلاوة الموضوع قريته 3 مرات
واللى فهمته انك بتتكلم عن مظاهر الغنى والتبذير اللى بنشوفها فى المسلسلات والافلام
عاوز اقولك ان فى ناس كده واكتر كمان
لان مصر دلوقتى مبقاش فيها الطبقة المتوسطة
خلاص قربت تختفى
اللى فى مصر دلوقتى يا اما غنى اوى.. يا اما فقير اوى
وعلشان تعيش فى البلد لازم تفتح مخك كويس وتعرف ان الجنيه غلب الكارنيه
لان ابن دكتور الجامعة لازم يطلع دكتور جامعة
وابن الظابط لازم يطلع ظابط وابن الميكانيكى بيطلع سباك
واحب اضيف لمعلوماتك ان الشكرمون طاخ فى الترلولى
والناس خلاص مبقتش قادرة تمسك نفسه

لو نيلك يامصر صلصلة....مش هيكفى الكوسة اللى فى بلدنا

ايه يا نيستا انت كده هتبوظ المعلومتين اللي طلعت بيهم من الدنيا
ايه اللي جاب بقي السباك للميكانيكي
اااااااااااه واخد بالي انا قصدك انه ميكانيكي تواليتات صح؟
ههههههههههههههههههههههههههههههههههه
واحب اشكرك بشده علي المعلومه الجميله دي


والمقوله الرائعه دي اللي هتفضل لاحفاد احفادنا




ميرسي يا جميل علي خفة ظلك
ونورك اللي نور الموضوع ربنا يستر بقي والكهربا متقطعش
تحياتي لك
وبالتوفيق والتالق إن شاء الله
KEEP
MOVING
FORWARD

والله ياباشا لا خفة ظل ولا حاجة
ده اللى اسمه هم يضحك وهم يبكى
انا عاوز اقول كلام كتير بس مش عارف
خايف يكون المنتدى متراقب ولا حاجة ونزعل حبايبنا ربنا يجعل كلامنا خفيف عليهم

الموضوع ده المفروض يتثبت ليكون عبرة للجميع وليك انت بالذات

باشا ايه بس يا نيستا هو انا من امن الدوله ولا ايه
طب ده حتي انا بكرههم كره العما ربنا يجعل كلامنا خفيف عليهم
وعلي فكره اي كلمه صغيره بعتبرها عبره ليا وبتعلم من كل اللي بقراه
قول انت رايك بكل صراحه ووضوح ومتخافش من بنى آدم ابدا ربنا كبير اوي وقادر علي كل شئ
ميرسي يا جميل ويارب اشوفك بتلعب في اي سي دماص قصدي ايه سي ميلان

تسلم ايدك يا هوبا على التوبيك اللذيذ ده
واللى بجد بقى حاجه سخيفه فعلا
كله فعلا بقى مسابقات فى اخر صيحه ميكياج وعربيات ولبس وغنى فاحش
يااما العكس فقر فاحش لو جاز التعبير
واللى طالعين فيه السينما الواقعيه "احنا مش بنضحك على الناس احنا بنوريهم اللى حاصل "
انا عن نفسى احب بتوع الفيلات اللى بيزيفوا عن الافلام دى اللى مش عليها رقابه وخاصه لما يكون واحد من اللى بيمثل النوع ده
المذيع يقوله انت مش خايف المراهق اللى بيحب يقلد يعمل كده او انك توحيله بكده
رد كده بكل لامباله : والله احنا مش حنربيه واهله فين اللى سيبينه لحد مايجى يتعلم من السينما وانا ارفض السينما النظيفه"
وكأن الفن مش رساله ولا له قيمه
عارف كمان مشكله المسلسلات ايهانها مش بتبقى قصه وتيجى الممثله تمثلها لا ده بتبقى الاصل
ممثله ويترسم لها دور لازم تبقى بنت ناس عاقله حكيمه شديده البأس واهم حاجه عندها اصرار
ولو بقى خلاص مؤلف عاوز يعمل شغل يطلعها فقيره واتبهدلت بس لازم فى نهايه المسلسل تكون اتغنت وتلبس برضه وتركب عربيات
الفن دلوقتى مش بقى تعبير عن المجتمع بقدر ماهو مجامله للمثل

فعلا يا اسراء عندك حق الفن بقي سلعه تشتري
زمااااااااان كانوا بيعملوا افلام علشان تحل مشاكلنا هادفه يعني
انما دلوقتى الحكايه بقت ايرادات وبس
وفعلا الادوار بقا بتتفصل حسب الطلب والمقاس زي البدل والفساتين كده وكرفتات وعربيات كده يعنى
علي فكره انا مع الافلام الواقعيه بس لو كانت خاليه من الابتذال وده طبعا مش موجود في الاساس
زي مابيقولوا علشان تنجح وتبقي مشهور لازم ومش هينفع اكمل
ميرسي ليكي يا اسراء نورتيني يا قمر وافدتيني برايك الجميل ده
تحياتي لكي
والي الامام دائماً إن شاء الله

ههههههههههههههههههههههههههههههههههههههههههههههههههههه
جامده اوى الموضوع ده تسلم ياايهاب

ميرسي يابو حميد نورتني يا جميل
بالتوفيق إن شاء الله

اية المواضيع الجامدة دى هوبا عادتك واللة دايما موضيعك جامدة كدة
اولا انت بتتكلم عن الناس اللاغنياء فى مصر انا عايزة اقولك ان مصر دلوقتى ملاينة ناس كدة واللة ومتوليش هما فين موجودين دة طبعا من كتر النهب والسلب
وبعدين حضرتك بتتكلم عن تيزة نادية اللى مش عرفلها عمر لغاية دلوقتى
لو خدت بالم من التتر بتاع المسلسل هيقولك مستحوى من المخابرات المصرية
يعنى قصة واقعية انا عايزة اعرف بالها كام سنة القصة دية لان شكلها قديم اوى
وكمان عن الافلام والنهضة الفظيعة والتقدم الماهول اللى حصل فى الافلام اللى بيقولة علية
يعنى بيقولوا تحرر بقة احنا لاازم ننلفس الغرب وادينا بنافسهم اهو بنفسهم فى المسخرة وقلة الادب وسممحنى على اللفظ دة يعنى فيلم زى هى فوضى وحين مسخرة دول افلام كل المخرجين قالوا هتنجح وبجدارة لاننا بذلنا فية شغل انا مش هكلمك عن حين ميسررة لانة ممكن يكون جايب لممسة عن الواقع لكن هى فوضى المششاهد اللى فيها منة شلبى والمشاهد اللى فى الزنزانة كل دة نفسرة بية حرية ملعون ابو الحرية دية اللى تخلينا نخرج عن دبنا
انا مش عارفة اقول اية

هتقولي ايه اكتر من كده انتى قولتي الافاده كلها
احنا بقينا بنقلد الغرب خاصة في الاباحيه والابتذال
ميرسي ليكي ياقمر نورتيني
تحياتي لكي

حلو اوي المسلسل ده قصدي الموضوع ده
ربنا يكون في عونا احنا اللي هنشيل الهم كله

ههههههههههههههههههههههههههههههه
ميرسي يابوحميد
تحياتي لك

موضوع جامد جدا يا هوبا والله تسلم ايدك
بالنسبة للناس الاغنيا اللى فى مصر اللى هم طبعا فى اماكن محدده وكلنا عارفينها
واللى مستولين على البلد بكل معنى للكلمة سواء اقتصاديا او سياسيا او حتى تحت اى بند
برده لازم يستولوا على البلد اجتماعيا اشمعنى دى يعنى
مهم دول اللى معاهم فلوس يصرفوا على الافلام وليهم الحق انهم يقبلوا نوع السيناريو وليهم الحق
انهم يطلعوا الباشا اللى هيمثل الفيلم او المسلسل وهى دى الديمقراطية اللى احنا بنعيشها
الناس دى يا بوب خلاص بترسم افكارنا وهترسم افكار اولادنا ده اذا حبيت تجيب تليفزيون فى البيت
وحكاية ان الواحده تروح لواحد بيته كده عادى جدا يا ناس طشيب اذا بليتم فاستتروا
لكن ازاى دول لازم يطلعوا فى دماغ البنات انها حاجه عادية والولاد ان البنات حلال فيهم اللى بيحصل ده
على العموم انا فى الاول وفى الاخر باقول العيب فى السياسة يا جماعه
والله العيب فى السياسة
هى اللى سامحه بان اقتصادها يبقى فى ايد ناس معينين فى البلد يتحكموا فيه زى ماهم عايزيين
والا احنا نسينا الخصخصة
وهم اللى سامحين للاعلام يبقى فى قمة الديمقراطية لكن مش ديمقراطية اوى يعنى الناس تطلع عريانة تبقى هى دى الديمقراطيه
انها يطلعوا يقولوا كلمة حق لا عيب ازاى ده حتى مش منظر حضارى ادام الدول التانية
هههههههههههههههههههههههههههههههههههههههههههههههههههههههه
سلامات يا دول
مش عارفة اقول ايه بس اظاهر اننا علشان نمشى صح لنفسنا لازم مندخلش فى بيوتنا المخروب اللى اسمه تليفزيون
يا اما بقى نمشى زى ماهم عايزيين
اييييييييييييييييييييييييه دنيا على رايك يا بوب
موضوع جميل يا هوبا والى الامام دائما
وانا مع نيستا ان الموضوع يستحق التثبيت
بالتوفيق والنجاح دائما يا هوبا ومنتظرين منك الجديد دائما ان شاء الله

ميرسي يا ميرو كفايه انك نورتيني يا قمر
انا عارف ان في ف مصر ناس اغنيا كتير بس دول من رايي ان المفروض لا يقال عنهم مصريين
انا مش هتكلم كتير بس ايه حكاية التليفزيون دي طيب ماهو في ناس عندها تليفزيون وبيستخدموه الاستخدام الامثل ليه وفي ناس معندهاش وافظع واضل سبيل
وميرسي ليكي مره تانيه وتالته كمان
تحياتي لكي
وتمنياتي لكي بدوام النجاح والتوفيق إن شاء الله