ازيكم يا حلوين ؟؟؟؟؟؟؟
يارب تكونوا بخير وسعادة
طبعا احنا دلوقت فى مرحلة خطرة
وهى مرحلة الامتحانات وانا كنت عايز اقولكم على كام حاجة كده تحطوها حلقة فى ودنكم
او خاتم فى صباعكم
فى ناس عندها لسة وقت للمراجعة وخصوصا الناس اللى فى الثانوية العامة
ودول بقول لهم اى حاجة فى اى مادة مضايقاك او مش فاهمها او صعبة عليك
حاول انك تحصلها لان لسه قدامك وقت
بلاش تحبط نفسك وتقول خلاص الوقت عدى وفات وتغنى ع اللى جرى
لا ذاكرها دلوقت وان شاء الله حتثبت فى دماغك كويس ويمكن كمان احسن من اى حاجة تانية
اما بالنسبة للناس اللى بدأت امتحاناتها او لسه حتبدأ قريب - خصوصا الناس اللى فى كليات - فانت خلاص حصلت اللى حصلته
المهم بقى تركز على الامتحان ذات نفسه
وبلاش تشغل نفسك بأى حاجة تانية
ودلوقت حنقول انك رايح اللجنة الصبح عشان تمتحن
اكيد طبعا حتبقى قلقان الى حد ما وده طبيعى جدا
بس المهم القلق ده ميزدش عشان متتعبش اوى ومتعرفش تنيل حاجة فى الامتحان
لو انت من الناس اصحاب المعدة المضطربة بلاش تفطر
اه بلاش تفطر فطار كامل
كفاية اوى تشرب حاجة صغننة كده ويفضل تكون عصير
و ممكن تاكل شيكولاته قبل الامتحان عشان بتساعد على الاسترخاء و هدوء الاعصاب
فى اول يوم امتحان روح بدرى بتاع 1/2 ساعة عشان تدور على مكانك وتقعد فيه حبة عشان تتعود عليه
اهم حاجة بقى مترغيش كتير وبلاش تبدأيومك بتهييس عشان دماغك متفصلش بدرى
اصلا الامتحان بيحتاج طاقة كتير و ذهن صافى عشان تقدر تسترجع معلوماتك بسرعة وبدقة وبسهولة
وانا بحذر اى واحد منكم لما يروح اللجنة من فئة معينة من البنى ادميين
اوحش ناس ممكن يضيعوا عليك الامتحان والمذاكرة بتاعتك كلها
الا وهم الناس اللى تلاقيهم متلخبطين وعمالين يجروا يمين و شمال يسألوا فى كذا و كذا
محمد هو قانون اوم بيقول ايه
قاعدة ارشميدس ايه
هو النص بتاع مطران اسمه ايه الظهر ولا الليل
غالبا الناس دى بكون عارفة كل حاجة بس هى نفسيتها سودة اوى وعايز تلخبط اللى حواليها
يا راجل قول كلام غير ده
لا بجد انا قابلت النوعية دى و الحمد لله ربنا نجانى منهم
الخلاصة انك بلاش تتكلم عن حاجة فى مادة الامتحان عشان متوهش نفسك
دلوقت خلاص انت قعدت فى اللجنة وخدت ورقة الاجابة سطرها كده و اكتب بياناتك وظبط حالك
واقرأ اللى تقدرعليه من ايات القرأن الكريم عشان ربنا يفتحها عليك
وفجأة استلمت ورقة الاسئلة
بص يا بنى سد ودانك وما تبصش حواليك وابدأ على طول فى الحل
لييييييييييييييييييه؟؟؟؟؟؟؟؟؟؟؟؟؟؟؟
عشان لو الامتحان صعب حتلاقى صويت وعياط وناس بتشد فى شعرها
وانت مش ناقص فانا عايزك تعمل زى الفيلسوف العظيم اللمبى وتقول لورقة الاسئلة
اوعى يغرك جسمك
بس بأمانة يا جماعة انا بتكلم بجد 70 % من حل الامتحان بيعتمد على هدوء اعصابك
اما القلق والخوف بيضيع منك المعلومة السهلة قبل الصعبة
وبعدين انت مذاكر - ده المفروض - فخلى عندك ثقة بالله اولا وبنفسك ثانيا
وان شاء الله كل شىء حيبقى تمام
بعد الامتحان اللى حصل حصل - او بصل
- المهم تنساه وتستعد للى بعدهخدت قلم كبير فى امتحان ولا يهزك الكلام ده
على طول صدر خدك التانى وان شاء الله تاخد عليه بوسة مش قلم
وافتكر المثل اللى بيقول
There is no use crying over spilt milk
لا فائدة من البكاء على اللبن المسكوب
وان شاء الله مش حيبقى فى لبن مسكوب و لامية ولا عصير و لااى حاجة خالص
انت ذاكرت وعملت اللى عليك يبقى خلاص حتاخد مجهودك بدون ادنى شك
بس المهم تكون تعبت بجد
وان الله لا يضيع اجر من احسن عملا
=====
انا تعمدت اكتب الموضوع - كالعادة - يأسلوب مضحك - فى نظرى - عشان محدش يقلق من الامتحانات
ومحدش يخاف خالص
دى زى شكة الابرة
صحيح هى ابرة تريكو بس ان شاء الله حتعدى على خير
وشكرا
بقلم ساخر
صديق كريبتونى
