كيفكم يا هيومانز ؟؟
عاملييين ايه فى الحر ده ؟؟؟
يا رب تكونوا سقعانيين
النهاردة يا اخوانى عايز اكلمكم عن حاجة مهمة جدا فى حياتنا
و خصوصا فى الوقت الحالى
الا و هى الثلاجة
مش التلاجة كجهاز و لكن الثلاجة كايحاء
ايه اول حاجة تخطر فى بالك لما تسمع كلمة ثلاجة ؟؟؟
غير الحاجة الساقعة و الايس كريم
برغم صعوبة السؤال
الا انى حجاوب و اقول
البرووووووووووووووودة
البرود عمتا كصفة للبنى ادم مش كويسة
و لكن فى ظل الظروف اللى احنا فيها فهى بقت مطلوبة جدا
حفظا لصحة سيادتك
حتقولى ازاى ؟؟؟؟
حقولك خليك زى الثلاجة .. باااااااااااااارد
طبعا حيطلع واحد ظريف و يقول نوعها ايه ؟
و حتبقى نوفروست و لا عادية ؟؟
و مع البيئة و لا ضدها ؟؟؟
طبعا دى مجرد اسئلة غبية عشان انرفز سيادتك
فلو انت اتنرفزت من غباءها
اعرف انك محتاج بجد انك تكون ثلاجة
و الا
حتتعب اوى فى الدنيا من كتر المواقف اللى حتشوفها
و نضرب كده كام مثال
و لنفرض ان سيادتك ماشى فى الشارع لا ليك و لا عليك
و فجأة تلاقى واحد خبطك بعجلة
و كمان بيزعق فيك
طبعا سيادتك ممكن تعمل حاجة من الاتنين
يا تتشل من وقاحة الراجل
يا تروح مطلع عين .........
بس فى الحالتين حتخسر اعصابك و صحتك طب و ليه ؟؟؟
ما اقوله معلش و اسيبه و امشى
مثال مش مظبوط مش كده
طيب و لنفرض انك فى فرح و اثناء العشاء الجميل جه جرسون و الدته داعية عليه او عليك
و راح موقع عليك اى حاجة
طبعا البدلة اتنيلت و منظرك بقى مش و لابد
بس برضه حاول تمسك اعصابك و بلاش تتضايق و عديها
صحيت الصبح مثلا فى حدود الساعة 2 الضهر
و بتشوف ايه الاخبار
لاقيت الحاجات كلها سعرها ارتفع تانى
عادى جدا
و لا يهزك
ابتسم و تقبل الامر بكل هدوء
بس لازم تعدل المنظم عشان متفرقعش
نيجى للمهم لو انت لسه بتقرا
التعاملات مع البنى ادميين
فى عالم كده رذلة و رخمة و معندهاش دم
عندها بجاحة الدنيا كلها
يعملوا مواقف زى الزفت و بعدين يسيبوك تطق
لا لشىء الا انهم معقدين نفسيا و يحبوا يتنططوا على غيرهم
انت مثلا فى الكلية و لاقيت واحد شبه الضفدع كرم
جاى يرخم على سيادتك و يقول كلمة كده غبية زيه
او مثلا انت واقف مع زميلة او صديقة و ده جاى يقرفكم ال يعنى واد ناصح
ده بقى تسيبه عادى خالص و فوق كده
اضحك فى وشه
و عدى المر عادى
و بدل ما هو ينرفزك
حتلاقيه هو اللى طق و اتنرفز و بقى منظره اندر وير
و الله يا جماعة انا قابلت عالم بتموت فى انها ترخم و ترذل على غيرها
و تستقوى عليهم بالكلام و تكبسهم
و انا فعلا بضايق جدا عشان بلاقى الناس غلابة احيانا و مش عارفين يعملوا ايه
فأسهل حاجة
اوعى تبين انك متضايق عشان ميستحلاش الموضوع
و اتصرف عادى خالص و سيبك منه
و لو مش حتقدر يبقى سيبله المكان و مشى
و لو هو برضه لازقة و معندوش دم
طبق المثل
لا يفل الحديد الا الحديد
يا ترد عليه رد من تحت لتحت يكبسه يا تخليك مع واحد زيه كده بس تبعك
و سيبهم هما ياكلوا بعض
انا اللى خلانى اتكلم فى كده ان واحد كان بيرخم على واحد تانى و بيتنطط عليه فى الكلام
و التانى غلبان مش عارف يرد
حظه انى كنت موجود
و رحت قايل لعم الكتكوت كلمتين لذاذ كده
وشه احمر و اخضر و اصفر زى اشارة المرور
و ما صدق الاشارة فتحت
و راح ماشى
طبعا تصرفى غير سليم الى حد ما
و لكن للأسف هى دى الطريقة اللى قدرت اعامله بيها
لان الحسنى دلوقت بقت تعد عبط
و تلاقى الناس مستضعفاك
فالاحسن انك و لا ترد و لا تتنرفز
و سيبه هو ياكل فى بعضه
و احرق دمه زيادة وابتسم فى وشه
و شكرا
