كيف الاحوال يا احلى هيومانز
يا رب تكونوا بخير و سعادة
ان شاء الله يا جماعة حبدأ معاكم سلسلة صغننة كده
اسمها
مجتمعنا
ححاول فيها انى اركز على بعض النقاط السلبية فى المجتمع
و انقدها بأسلوبى الخفيف او السخيف
المهم
انى حنقدها حنقدها
و طبعا اتمنى من الكل انه يشارك و يقول رأيه فى الموضوع
موافق
معترض
مش فارقة معاه
و كالعادة فى كل موضوعاتى
احب انبه السادة اللى حيخاطروا بعقلهم و يقروا الكلام
انى غير مسئول على الاطلاق
لاى حالات صرع اوعبط او جنون
( سخافة من اولها )
بسم الله
نبدأ
المظهر الاجتماعى
طبعا احنا بنعيش فى زمن الغلاء و ارتفاع الاسعار و خلافه
( ايه البداية اللى زى الزفت دى )
و رغم كده
فى بعض المظاهر و اللى بتدل على ان ناس كتير
تصنف على انها فقرانة
هى المتسببة فى كونها عايشة فى غلاء زيادة
( طبعا انا مش بدافع عن الحـكـ ...... طرااااااااااخ )
عودة بعد القلم
انا بس حقول بعض المظاهر دى و نشوف سوا كده ايه رأيكم
1 - عم الامور مش عاجبه الموبايل بتاعه
مع انه لسه شاريه من شهرين
بس هو عايز يغيره عشان خاطر
زميله الفرفور
جاب موبايل لسه نازل الاسبوع ده
( حقد طبقى و غل )
لا مش حقد و لا غل لان للأسف بتلاقى ده بيحصل
من الولد او البنت دون اى مراعاة للأب
او ماكينة الصرف بتاعة البيت
و بعدين حتى لو فلوسه متلتلة
هل معنى كده انه يعود ابنه او بنته على كده
ما اظنش ابدا ان ناس بالمنظر ده ممكن يفلحوا
لانهم مش بيتعلموا قيمة الاشياء
2 - من الناس الفقرانة بقى
واحد قارص على نفسه و عياله عشان يجيب موبايل
يا ريته حيستفيد بيه
دا جايبه عشان يشمى يتكلم فيه وسط زمايله
و يعمل انه حاجة مهمة و الناس بتكلمه
و هو اصلا مش بيعرف يفتح الموبايل
3 - نيجى بقى لأهم نقطة
جهاز العروسة
( طراااااااااااخ طراااااااااااخ طراااااااااااخ طراااااااااااخ طراااااااااااخ )
طبعا اكيد لاحظتم ان الضرب كله اقلام
عشان اكيد البنات حتتضايق
بس انا ميهمنيش
اللى مش عاجبه
يشد فى حاجبه
( طراااااااااااااااخ )
بالله عليكم
هل من المعقول ان البنوتة روح طنط
لازم تشترى الاتى :
( فى حالة وجود غلط بالقائمة نرجو من سيادتكن التصحيح )
1 - طقم صينى
2 - طقم اكروبال ( متهيألى الكلمة كده )
3 - طقم بايركس
4 - طقم حلل الومنيوم
5 - طقم حلل صاج
6 - طقم صوانى
7 - طقم شاى
8 - طقم قهوة
9 - طقم عصير
10 - طقم رز بلبن
11 - طقم كنك ( جمع كنكة )
12 - على قد ما تقدر اطباق
13 - على قد ما تقدر شوك و سكاكين و معالق
14 - على قد ما تقدر ..........
الخ الخ
( احب افكركم انى مش بنتقد البنات و لكن بنتقد المجتمع كله )
المهم
المصيبة بقى
ان 3/4 الحاجات دى بتتحط فى متحف
يعرف باسم
النيش
طب و هل من المعقول
انك تدفع الاف الجنيهات فى حاجات اغلبها
للمنظر
ازاى
مش ده برضه اسراف و لا ايه
و المشكلة الاكبر ان اهل العريس هما كمان بيساعدوا فى المشكلة
بالتريقة على اهل العروسة
فأهل العروسة لازم يجيبوا افخم حاجة عشان المنظر
و هكذا بندور فى حلقة مفرغة
بين اهل العريس و اهل العروسة
المفروض ان الغرض هو الجواز
مش انى بعمل مخزن تحف ( البيت ) ارمى فيه فلوس و خلاص
طب ما نديها للعريس و العروسة تساعدهم فى حياتهم
مش يبقى احسن و لا ايه
خاصة فى ظل الظروف اللى احنا فيها
فعلا غباء
( انت اللى غبى يعنى مها و سها و نها يجيبوا و انا لا
هما يعنى احسن منى فى ايه )
فعلا و اضح انى عندى خلل فى التفكير
نهاية الجزء الاول
ارجو انها تنال اعجابكم يا بنى ادميين
و يا ريت طبعا تعلقوا على اللى انت عايزينه
و منكم نستفيد
KRYPTON
ما علينا انا شايفة انه مش بس علشان الظروف المنيلة اللي الكل بيمر بيها مش لازم المصاريف الرهيبة اللي بيصرفوها سواء العريس واهله او العروسة واهلها لان اكيد مش وجود الحاجات الكتير دي او عدم وجودها هو اللي هيخلي البيت جنة لو الحب بين الاتنين مش موجود مهما توافرت الامكانيات التانيه دي البيت هيبقى جحيم لا يطاق مفيش اجمل من الحب بس الحب الحقيقي اللي مش موجود منه دلوقتي في السوق غيير المضروب 
