السلام عليكم و رحمة الله و بركاته



الى جميع الايجيهاتية 

ندخل فى الموضوع على طول

عشان بصراحة الواحد اتخنق



كل شوية و كل فترة نلاقى موضوع بيتحدث عن الاتى

الدنمارك 

الاساءة للرسول الكريم

المقاطعة

البيبسى و كنكاكى



الاول يبدأ الموضوع بالكلام عن اى حاجة حصل عليها تجمع

مثلا

حبس تامر حسنى

هروب عصام الحضرى

فوز مصر ببطولة الامم الافريقية

و غيرها و غيرها من البدايات 

و بعدين يبدأ يخدك على الحتة اللى عايزها

و يقول

و انت بقى عملت ايه 

للدنمارك و الاساءة و المقاطعة 

و لا انتم فالحين بس تفرحوا بالاجوان و تزعلوا على تامر و عصام

يلا 

قوم قاطع

دافع عن دينك

و مش عارف ايه

طبعا سيادتك تقرأ الكلام 

تتشحن 

و تغضب

و تثور

لا

انا لازم اقاطع العلوج الامريكان

لازم اخد موقف

و بعدين لما تهدى شوية 

تعرف ان الحاجة الوحيدة اللى تقدر تعملها

انك

تشرب من البحر

و لا اقولك

روح اخبط دماغك فى الحيط

( اه يا عميل يا خاين يا عدو ) 

قول اللى تقوله 

انا قرفت من الكلام الفرقعة

اللى عايز يعمل حاجة  زى المقاطعة 

يبقى الاول عنده لقمته

عشان يعرف يقاطع

حلو اوى الكلام بتاع الناس اللى بتقول قاطعوا منتجات الدنمارك و اوروبا و امريكا

بلاش بيبسى 

بلاش كنكاكى

ماشى يا عم 

بلاهم

الواحد اصلا معهوش فلوس

بس بالمرة بقى

قوللى كده تحب بقى تشرب لبن ابو بودرة سيراميك

و لا تاكل لحوم الكلاب والحمبر

اظن دى منتجات مصرية مية المية

و بلاش بيبسى 

طبعا خلينا نشرب عرقسوس فى كبايات مش بتتغسل 

بقالها سبع سنين

ما جدودك كانوا كده

جدودى اللى بتتكلم عليهم 

كانوا بياكلوا الخضار من الارض بطينه

كان انضف من دلوقت

و انا على فكرة مش ببالغ

كان فعلا الخيار و الخس كان بيتاكل كده من غير غسيل 

عشان الحاجة كانت نضيفة

و بعدين فلوس ايه اللى بتروحلهم من البيبسى و الكنتاكى

دول بياخدوا عمولة عبيطة على الاسم

ولا انت فاكر نفسك بتشرب البيبسى بتاعتهم

لا يا عم الامور

انت بتشرب مية مسح

و اللى سافر السعودية و شرب البيبسى اللى عندهم

يعرف ان البيبسى اللى عندنا دى مكوناتها كلها من عندنا

و العمال مصرييين

بس مش مهم

دول عالم خاينيين

نقطع عيشهم و نسيبهم يشحتوا

بس بالمرة يا حبيبى 

قاطع العيش اللى انت بتطفحه

ما هو معمول بالقمح الامريكى

مش انت واخد موقف اثبت بقى



كل اللى فات ده مش مهم

المهم بجد 

ان الناس دى بكل سهولة تستغل مشاعرك و تقول 

انصر دينك و دافع 

كفاياك تخاذل

صح كلامك مظبوط

اشحن الناس جامد

و بعدين الناس متلاقيش منفذ

تقوم تفرقع و تحس بالذل و الهوان و الخيبة

و تكره عيشتها اكتر و اكتر

و معلش بقى

انا بقول للعالم دى

انتوا بتلعبوا بينا 

و بتستغلوا الدين عشان تسوقونا

طب ما هو الدين بيقولك اجتهد و اتعب و اعمل اللى بتقدر عليه

متخليش رقبتك فى ايد غيرك

و اعدوا لهم ما استطعتم من قوة

فين بقى كل ده

و لا هو كلام فى الهوا

قاطع قاطع قاطع

عايز تقاطع روح اتفضل و قاطع براحتك

بس متستغلش الناس 

احنا مش ناقصين

و احنا اصلا عايشين بالمعونات و الكلام ده معروف



يا جماعة

انا مش معترض على المقاطعة 

و هى طبعا سلاح قوى 

بس عشان تقاطع لازم يكون ليك كيان قوى يسندك

مش تبقى بتاكل من فضلات غيرك 

و بعدين تقولى قاطع

لازم نبنى نفسنا و نعمل اكتفاء على قد ما نقدر 

و بعدين نقاطع



و النقطة اللى خنقانى بجد 

استغلال الدين

و الرسايل اللى تجيلك 

ابعتها لـ 25 و الا حتبقى متخاذل

طب ايه مضمونها

مثلا واحدة كانت بتقول

لقد نصر الله نبيه

و مات صاحب الرسوم الدينماركى الحقير محروق

اكيد الواحد فرح 

و كان عايز يعمل فرح

بس فجأة 

اعرف ان الراجل حى يرزق

تفتكروا ساعتها

ايه اللى حيخطر فى بالى

اه

دول المسلمين دول بتوع دجل و خزعبلات

و كمان 

كدب

مش الكذب ده من صفات المنافقين و لا ايه

و انت بتكدب على مين

على مسلمين زيك

يا اخى اتقى الله



اتمنى يا جماعة تكونوا فهمتم مرادى من الموضوع

و طبعا احب اعرف رأيكم فى الكلام

لانى عن نفسى زهقت 

هو ايه الاستغلال اللى احنا عايشين فيه ده

من فوق و من غيرهم 



ربنا يصلح الحال





و شكرا

موضوعك حلو اوى يا كربتون بجد تسلم ايدك على الموضوع الجميل ده

شكرا ليكى يا دوللى
على مرورك و ردك

والله موضوعك يا كريبتون جي على الجرح عايزة اقولك ان الواحد لما كان عايش بره مصر عمره ما حس انه غريب ولما رجع بلده او يعني اللي المفروض انها بلده عمره ماحس انها بلده فعلا وعجبي

شكرا ليكى يا مولا على ردك

اولا تسلم ايدك ياكريبتون على التوبيك
بص انا معاك ومش معاك
يعنى فعلا انا بشوف التوبيكات دى وبيضيقنى فيها الجزء بتاع انتو مش بتعملوا حاجه وكده
يعنى ياعم انت بلغت وخلاص
لكن ارجع واقولك احيانا بتبقى تذكره يعنى عارف المده طولت وكده وبعد ماقلنا حنقاطع وكده بالتدريج تلاقىالوااحد بينسى ويرجع تانى
مش بقول نقاطع كل حاجه بس فعلاالحاجات اللى ليها بديل هنا ومش محتاجينها مش الضروريات
بس فى كده فى السوبر ماركت حاجات مستورده مش ليها لازمه علىالاقل يعنى نقدر نقاطعها

تسلم ايدك يا كريبتون توبيك تحفة بجد
وبجد عندك حق في كل كلمة
فعلا وفعلا زي ما اسراء قالت الناس تبدا تقاطع وواحدة واحدة ينسوا كل شيء
كلها شعارات وبس
ياريت زي ما بنتكلم زي ما نعمل
مش يقولون مالا يفعلون
وتسلم ايدك

يعنى انت يا اسراء معايا فى انهم ببيستغلوا الناس

و بيشحنوهم على الفاضى

و لكن قد يكون هناك فائدة من الموضوع و هى التذكرة

رأيك طبعا ليه احترامه و اشكرك على مشاركتك بيه

و اكيد طبعا المقاطعة مطلوبة بس المهم يكون فى بديل

و ده اللى انا قلته

و انا بشكرك على ردك 

و نورت الموضوع

شكرا ليكى يا مشمش

بس الناس معذورة

اديكى شايفة الحال و الغلاء و الفساد

على الاقل بيجيبوا الحاجة 

اللى احتمال جودتها اعلى



نورت الموضوع 

و شكرا على ردك

موضوعك مهم يا كريبتون . و صح حانقاطع ايه و لا ايه . و لو قاطعنا يبقي حانصرف كل فلوسنا عالامراض اللي بتيجي لما تشجع صناعه بلدك كمان الحاجات دي معموله هنا عماله و خامات مصري احنا الي حنتاذي في الاخر .
ورايي ان احنا نعرف الناس دي علي ديننا صح و ساعتها حايحترموه زي مواقع انجلش يقدرو منها يعرفو الاسلام
و شكرا تاني

شكرا ليكى يا كتكوتة
و انا طبعا متفق معاك مية مية
نورت الموضوع