ازيكم يا ايجيهاتية
عاملين ايه
يا رب تكونوا بخير و سعادة
طبعا بما اننا هنا فى قسم الفضفضة
فحبيت انى افضفض معاكم شوية
اولا
كل سنة و انتم طيبين
خلاص شهر رمضان على الابواب
و الحكاية كلها اسبوعين
و يأتى علينا الشهر بخيره
بس مش عارف ليه
مش قادر احس بالفرحة بقدوم شهر رمضان
متفهمونيش غلط
بس زمان لما رمضان كان يقرب
كنت تلاقى الواحد فرحان و سعيد و الجو مليان سرور
و كان الواحد بيتشوق لرمضان
كل حاجة طعمها مختلف فى رمضان
سواء عبادة او عمل او حتى اكل
كان الواحد فعلا بيحس بأمن و طمأنينة
بس من فترة كده
حسيت انى مش لاقى الروح الحلوة دى فى رمضان
تفتكروا العيب فيا
و لا فى الناس
عشان اتغيروا
و لا عشان البلد و حالها
و لا ايه بالظبط
انا فقدت الاحساس بروح رمضان من ساعة الثانوية الغامة
و هى غامة فعلا
الواحد كان على طول بيذاكر بيذاكر
و يروح الدروس
كان اليوم بيعدى فى الدرس و المذاكرة و النوم
و بعد الثانوية و دخول الكلية
لظروف ما
كان الوضع زى ما هو
الناس ذات نفسها نفوسها اتغيرت
و بقى كل واحد عايش فى حاله
و مش مهم غيره
قبل الفطار
الناس متعصبة و متنرفزة و كأنهم بيحاربوا
و برغم الصيام
تلاقى اللى بيشتم و اللى بيتخانق و اللى بيضحك على الخلق و يغشهم
و حاجات كتير اوى
مش فاكر ابدا انى بشوفها فى رمضان
دلوقت بقى رمضان زيه زى اى شهر عادى
طبعا انا مش عايز اتكلم عن الاجراءات الامنية
اللى بتشد حيلها
عشان عايز احضر رمضان فى البيت
مش ورا اسمها ايه
المهم
انا بس عايز اعرف
هل انا الوحيد اللى فقد الروح دى
و لا فى غيرى حاسين باللى انا حاسس بيه
؟؟؟؟؟؟؟؟؟؟؟؟؟؟؟؟؟؟
و كل عام و انتم بخير
