عاملين ايه يا شعب ايجي هات . يارب تكونو مبسوطين ومستنيين رمضان زيي .
النهارده معلش حاكلمكم علي حاجه رخمه وتعصب .
الروتين .
الحاجه البايخه اللي يتقابلنا في كل المصالح
الخطوات الطويله المعقده اللي فى رايي ملهاش لازمه غير مضايقه وتعقيد الناس .
انا مؤخرا لقيتني جوه موضوع الروتين ده بسبب غلطه موظف
يعني والنبي انا مالي انه غلط انا اتحمل نتيجه غلطه ليه .
المهم انه كتب اسمي غلط . انا اسم ابويا احمد هو الظاهر مش عاجبه
راح عامله مصطفي
ايه اللي جاب احمد لمصطفي الله اعلم .
المسافه بينهم بعيده برضه ولا ايه يا جماعه .
عشان الغلطه دي حقي راح لانها شخصيه تانيه وبتشتغل .
الغلطه دي حصلت في ورق معاش . يعني انا كده ماليش حاجه
ومطلوب مني اثبت اني انا
حد فاهم حاجه ؟؟؟؟؟؟؟؟
يعني اثبت ان اسم ابويا احمد مش مصطفي .
عشان اطلع انا صاحبه الورق .
طب هو غلط برضه انا مالي مايصلحوها هما .
لاء ازاي عيييييييييييييب ............
المفروض اني اخلي اتنين موظفين يمضو علي اسمي
واحط كمان ختم النسر
اجيبه منين ده يا ربي .
والموظفين بصراحه اكتر ناس خدومه يا سلام مقلكمش بيعملو ايه
بيحتفلو بالواحد بصراحه . بيقعدوه ويخدموه في مكانه .
واحنا بس عمالبن نطلع اشاعات انهم بيلففونا ال5000 لفه .
وكل واحد بيكون دايما علي مكتبه وعمرهم ما ياكلو وقت الشغل .
لو اعرف بس مين اللي بيسوء سمعتهم . مفترري .
المهم مالها بطاقتي ؟؟؟؟؟؟؟؟؟؟؟؟؟؟
مهي حلوه و جميله وفيها ختم النسر وابو الهول كمان
هو حد طايل
لاء مش معترفين بيها
والله طالعه من هنا مش مستورداها ولما هما مش معترفين بالبطايق يبقي اجباري نطلعها ليييييييييييييييييييه ؟
هو مش انا ممكن اضحك عالموظفين واغير بياناتي
لكن في البطاقه مش حاعرف
انما نقول ايه بقي ذكاء .
يعني الموضوع كان ممكن يخلص في 5 دقايق
الموظف يتكرم ويتعطف ويبص في البطاقه ياخد البيانات وخلاص .
يمكن مبيعرفش يقرا . وبيفهم لما يشوف النسر
طب انا واحده لسه شباب واقدر الف واطلع وانزل
انما الناس الكبيره التعبانه حاتعمل ايه .
لان عفوا المصعد مخصص للساده الموظفين واعضاء الاداره .
الواحد بيشوف مناظر تقطع القلب علي سلم المصالح .
بس حانعمل ايه حكم القوي
معلش طولت عليكم.
بس عايزه اعرف منكم ايه رايكم في روتين بلدنا
ويا تري شايفينله فايده واللي عنده حكايه مع الروتين
يحكيلي .
مستنيه ارائكم يلا سلام
يوه اقصد انا اللي عادتهم
