السلام عليكم ورحمة الله وبركاته

اصدقائى الايجيهاتيين طبعا كلنا مرينا بحاجات كتير فى حياتنا من اول مابدأنا نفهم ونستوعب

واكيد فى حاجات كتير أثرت فينا ومش بس كدة ده اكيد فيه حاجات كتير كانت سبب فى بناء شخصيتنا او

غيرت فى تفكيرنا وسلوكياتنا وممكن كمان تكون غيرت فى مجرى حياتنا كله

ممكن يكون شخص من الاسرة , صديق ، عابر سبيل فى حياتنا ، استاذ ، كاتب ........الخ

وممكن كمان يكون موقف حصلنا واثر فينا او حصل لحد واحنا اعتبرنا منه

كتاب او قصة قريناها غيرت فينا حاجات كتير

حاجات كتير اوى وجايز تكون حاجات بسيطة جدا فى نظر ناس تانيين

لكن كل واحد وطبيعته مش شرط كلنا نتأثر بنفس الواقعة او نفس الشىء

والموضوع ده بقة عشان نعرف اكتر عن بعض ونتعلم من تجاربنا وتجارب الاخرين واتمنى ان كل واحد

يدخل يقولنا على الحاجة أو الحاجات اللى أثرت فيه وأثرت فيه ازاى حتى لو كانت بسيطة المهم انها تكون أثرت فيه


ويارب الموضوع يعجبكم

ميرسيه يا دودو عالتوبيك الجميل
اللي غير مجري حياتي كله
اني قابلت حبي الحقيقي و تؤام روحي بجد

تسلمى ياكتكوتة انتى الاجمل
وربنا يوفقك يارب مع حبك الحقيقى وتوأم روحك وتعيشوا اجمل ايام حياتكوا مع بعض

توبيك جمييييييييل يا دوللى
بالنسبه ليا انا حياتى عاديه جدا
مفيهاش اى مواقف او احداث غيرت مجرى حياتى لحد دلوقتى
بس فيها اشخاص مهمه جدا ساعدتنى فى تكوين شخصيتى
طبعا اولهم والدى
وفيه واحده جارتنا وهيا دكتوره صيدلانيه كانت مثلى الاعلى
وهيا الصوره اللى بحطها قدامى دايما

غير كدا انا من البيت للكليه
ومن الكليه للبيت
هههههههههههههههه

مرسى ياسمسمة على مرورك الجميل
وحلو انك تكونى واخدة حد مثلك الاعلى وخصوصا لو كان الحد ده فعلا يحتذى به وان شاء الله تقابلى الحاجة اللى تغير مجرى حياتك للافضل

انا حاجات كتير اثرت فيا وسابت اثر كتير مثل لما كنت مخطوبه لى انسان مش مناسب
ولما والدى توفى من غير مشوفه وانى فقده فى حياتى وانى عايشه من غيرة ولحد دلوقتى بحاول اتقلم من غيرة
لانى كنت مرتبطه بيه جدا
الحمد الله ربنا عوضنى عن كل ده

مرسى على ردك يادوللى وان شاء الله ربنا يعوضك اكتر ويقدملك كل خير وطبعا مش اقدر اقولك تنسى والدك لكن هاقولك ربنا يصبرك على فراقه وتفتكريه بكل خير يارب

نايس توبيك يا دولي انا بعتبر اللي غير مجرى حياتي هو شغلي واللي لحمد لله بحبه وربنا موفقني فيه

موضوع جميل يا دودو
تسلم ايدك
و انا اللى اثر فيا
مواقف الحياة كلها

ربنا يوفقك اكتر واكتر ياامل وتحققى كل اللى نفسك فيه

تسلم ياكيرى بس انا اقصد اكتر المواقف اللى اثرت فيك
وكمان ياجماعة انا قصدى اثرت فيكوا ازاى يعنى كنتوا ازاى وبقيتوا ازاى

الحمد لله
مواقف سودة فى حياتى هى اكتر حاجة اثرت فيا
اتعلمت منها
عدم الثقة بأى حد او مفيش حاجة اسمها ثقة مطلقة فى حد
ثانيا
التعامل بلا رحمة و انا اولا
عارف ان الكلمتين صعبيين بس هو ده اللى اتعلمته
و ده اللى جنبنى حاجات كتير

هههههههههههههه
ماشاء الله ايه الحاجات الجميلة اللى انت اتعلمتها دى
ربنا يخليك علمنى شوية منهم
بس ان شاء الله ربنا يوفقك وتقابلك مواقف كويسة تغير حياتك وتحققلك اللى بتتمناه

شكرا ع التوبيك الجميل يا دوللى
اللى غير مجرى حياتى لما حبيبتى سابتنى
للاسف غيرها للأسوأ

هو فعلا موقف صعب جدا يا.......
بس مش لازم ده يغير حياتك للاسوأ يمكن ده الاحسن ليك وربنا اكيد ليه حكمة
وفى النهاية كل شىء نصيب ولازم تتعلم من التجربة عشان تبقى احسن مش تعيش تحت تأثير الصدمة وحياتها تتحول للاسوأ
اتمنى لك التوفيق ومرسى على مرورك ومشاركتك