"هاي ياجماعة.. أنا توتة من إسكندرية عندي 17 سنة وجميلة ونفسي أتعرف على واحد يحبني بجد.. ممكن؟"
عندك دش.. وموبايل.. ورصيد معتبر من الفلوس.. بس خلاص.. عدة الشغل كده كملت.
سيبك بقى من الشات على الإنترنت.. إنت كده مـتأخر جدا.. الشات دلوقتي على الهوا وهتشوف الكلام اللي بتكتبه وهتسمع كمان موسيقى.
مش بس كده.. لو إنت واد مخلص شوية هتقدر بشوية تركيز إنك تتعرف على بنت حلوة زي توتة بتاعة إسكندرية.. وغيرها كتير.
طبعا احنا متخيلين مشاعرك وتوتة بعتت على شاشة قناة الموسيقى اللي إنت بتعمل الشات عليها وبتقول لك "ميرسي قوي يا تيتو، بس أنا محتاجة أتكلم معاك حالا (ثم بمسكنة) ممكن"؟
طبعا هتشد شعرك علشان اكتشفت فجأة إن رصيد الموبايل خلص وإنك مش هتعرف تبعت لها تاني.. هتعمل إيه؟
هتنزل طبعا لأقرب محل موبايلات وهتدفع الـ100 جنيه وعليهم 10 كمان وإنت في منتهى السعادة، وتعود سريعا إلى ميلودي أو إلى مزيكا، وترسل إلى توتة وكلك فرحة..
"وأنا كمان يا توتة عايز أتكلم معاك، ممكن تبعتي لي رقمك؟!"
نتكلم بصراحة بقى..
عملت زي "تيتو" كام مرة..؟
وإنتى عملتى زي "توتة" كام مرة..؟
والنتيجة كانت إيه؟
وايه اللي بيخليك تعمل كده؟
ويا ترى هتفرق معاك لو عرفت إننا صرفنا السنة اللي فاتت بس 5 مليار جنيه على الكلام في التليفونات والـ اس ام اس والرنات واللوجوهات؟
ويا ترى هتفرق معاك لو عرفت إن المبلغ الرهيب ده لو اتصرف في مكانه الصح ممكن يفتح أبواب شغل لأكثر من 5.5 مليون عاطل عايشين بينَّا.. يمكن إنت تكون واحد منهم؟
تعرف إن فيه دراسة عملها مركز المعلومات بمجلس الوزراء وأثبت فيها إن 74.6% من مستخدمي الموبايل في مصر بيستخدموه للدردشة مع الأهل والأصحاب.. وبس.!
تعرف إن متوسط الإنفاق الشهري على الموبايل في مصر يتراوح ما بين 26 و300 جنيه مصري يعني تقريباً.. إنت ممكن تصرف في الشهر الواحد على الموبايل ضعف المرتب اللى بياخده خريج الجامعة!
هتفرق معاك لو عرفت إن كل المليارات اللي بنصرفها على الموبايل والـ اس ام اس بنصرفها وكل اللي معاهم موبايل في مصر لا يزيدون عن 6.5 مليون شخص بس.. تخيل بقى لو العدد زاد إلى 10 مليون مثلا.. المبلغ اللي هيتصرف هيكون كام؟
هتفرق معاك لو عرفت إن ترتيب مصر وسط دول العالم من حيث معدلات التنمية وصل إلى الـ 120 وده يعنى إننا –ولا مؤاخذة- دول عالم ثالث، ورابع كمان، وهو اللي يخلينا نسأل.. ازاي كل الفلوس دي معانا.. وازاي بلدنا مش في مكان متقدم يليق بها؟!..
ممكن نقف شوية قدام المراية ونشوف شكلنا؟
ممكن نراجع مع بعضنا اللي بنعمله؟
ممكن نحدد مع بعضنا اهتمامتنا وأولوياتنا؟
ممكن نفكر مع بعضنا بصوت عالي؟
ممكن نسمع صوتك .. والموضوع مش محتاج لا دش ولا موبايل ولا رصيد معتبر... بس اكتب رأيك