لبنان اتعلم الدرس
عشان كده كلهم صف واحد في الحرب
ممكن نتعلم منهم؟
المثل الشعبي المصري الشهير بيقول:
أنا وأخويا على ابن عمي، وأنا وابن عمي على الغريب
سيبك من الانتهازية والاستغلال اللي واضحة في المثل واللي بتدعوك لأن تقف مع أخوك ضد ابن عمك لمجرد إنه هو في الجانب الآخر بغض النظر بقى عن مين الصح والغلط، مش جايز إنت اللي تكون غلطان والمفروض أخوك يقف مع الصح اللي هو ابن عمك؟
مش كده وبس
ده بيقول لك بعد كده بقى اقف إنت مع ابن عمك -اللي إنت كنت لسه بتهاجمه - لمجرد إنه فيه حد غريب واقف قصادكم
احنا مش هنتكلم في الآثار السلبية للأمثال الشعبية المصرية ولو إنه والله موضوع حلو ابقوا فكرونا نتكلم عنه في يوم تاني
إحنا هنتكلم عن حاجة تانية خالص
بس قبل ما نغوص في التفاصيل تعالوا الأول نقرأ الفقرة دي
ولما فلينا ع الجبل حتى نحتمي من القصف كانت البيوت هناك مليانة ع الآخر بالعوايل، يعني فيك تلاقي البيت الواحد صاحبه مسيحي وآوي عنده أكثر من تلات عوايل منهم السنة والشيعة وكلن عايش بأمان
عارفة إن فيكن من يستغرب كيف يتجمع المسيحي مع المسلم الشيعي والسني في البيت الواحد، هادا الاتحاد مانو طبيعي، هايدا جديد، بس اللبنانيين اتعلموا الدرس منيح ووعوا للحرب السابقة
كلودين فؤاد
21 سنة- لبنانية- مسلمة- شيعية
كلودين بالمناسبة هي لبنانية جاءت إلى مصر مؤخرا، بعد أن شنت إسرائيل الحرب الوحشية على بلاد الآرز الجميلة
بس هاه
قريت ووعيت الدرس منيح؟
عرفت إنه في لبنان مافيش بقى قصة أنا وأخويا على ابن عمي أو قصة أنا وابن عمي على الغريب؟
ماتقولش بقى إنه عندهم حرب وماينفعش ياكلوا في بعض والعدو أساسا واقف ليهم على الباب
لأن الأمر ده في لبنان من ييجي أكثر من 15 سنة وتحديدا من سنة 1990 من وقت انتهاء الحرب الأهلية اللي استمرت هي كمان 15 سنة
شايفك بتضحك ومبسوط بعد ما مسكت مفتاح اللعبة في إيدك وبتقول:
طيب شفت يعني ما هم مابقوش مع بعضهم إيد واحدة إلا بعد ما حاربوا نفسهم لفترة طويلة يعني تمن الوحدة بتاعتهم كان غالي جدا راح فيه ناس كتير
جميل
قبل ما نرد عليك في النقطة دي
تعال نفكر مع بعض سوا في أكتر حاجة بتميز الإنسان عن غيره من الكائنات الحية التانية
لأ مش إنه مالهوش ديل
ولا إنه بيعرف يسوق عربية في حين القرد مش بيعرف ينقل الفتيس من التاني للتالت
واحدة من أكتر الأشياء التي تميز الإنسان عن غيره فعلا
أنه كائن لديه تاريخ
مش بس كده لأ وإنه يستفيد من الأخطاء التي وقع فيها ويمكن ده سر تطور الإنسان اللي بيحصل سنة وراء سنة من أيام الإنسان الحجري سيادتك كده
يعني الفأر مثلا –لأنه كائن ليس له تاريخ بمعنى أنه لا يستطيع أن يعرف ما حدث لزملائه السابقين إلا إذا شاهد ذلك بعينه- من الممكن أن يدخل المصيدة اللي دخلها فأر تاني قبله من غير ما ياخد باله إن في دخوله للمصيدة دي خطر خطر قد يصل لدرجة إنه يموت
في حين الإنسان يختلف لما بيعرف -من خلال قراءته للتاريخ- إن القطب الشمالي درجة الحرارة فيه تحت الصفر عمره ما يروح هناك وهو لابس مايوه مثلا
نفس الكلام لما يروح خط الاستواء وهو عارف إن حرارة الشمس هناك تشوي الأجساد مش معقول يروح هناك وهو لابس جاكيت من فرو الدب
نرجع بقى للنقطة اللي فاتت بتاعة إن اللبنانين لم يتحدوا معا –بكل طوائفهم الدينية المختلفة- إلا بعد ما دفعوا تمن ده بالدم بدمهم هم
لنصل إلى حقيقة مفادها ما يلي:
وما الذي يجعلنا نجرب ويلات الحرب الأهلية أو حتى غيرها من الخلافات الطائفية حتى نتحد رغم أنه يمكن أن نفعل ذلك دون طلقة رصاص واحدة؟
خاصة وأننا شفنا اللي عملته الحرب الأهلية في لبنان وازاي موتت في البلد الجميل ده ألف زهرة وألف ضحكة وألف حلم؟
لو بصيت على الحرب البشعة اللي بتشنها إسرائيل دلوقت على لبنان هتكتشف إن أكتر حاجة مخلية لبنان صامد لغاية دلوقت مش أسلحة –لأن فارق الأسلحلة بين إسرائيل وحزب الله كبير جدا- ومش دعم دولي –لأن دي طبعا هتبقى أسخف نكتة ممكن تسمعها في حياتك- وطبعا مش دعم عربي -لأن دي هتبقى تاني أسخف نكتة سمعتها في حياتك-
اللي مخلي لبنان واقفة على رجليها لغاية دلوقت
رغم إنها بتواجه خامس أكبر قوة عسكرية في العالم هو
الإيمان بأنهم على حق ومع الإيمان ده فيه شيء مهم جدا
هو إنهم من جواهم كشعب يد واحدة صف واحد
عارفين إن الرصاصة اللي بتقتل المسيحي بتقتل في نفس الوقت المسلم، والرصاصة اللي بترشق في قلب الدرزي هي نفسها اللي بترشق في قلب الماروني
مافيش فارق بين شيعي وسني وماروني ومسيحي ودرزي لأنهم كلهم في الأصل
لبنانيون
هو ده أكبر سلاح مع لبنان
والسؤال هنا
هو ماينفعش في مصر نبقى زي لبنان؟
وقبل ما تستغرب السؤال
أو تقول بطريقة الأكاديميين إن هناك فارقا في القياس
وإن المقارنة غلط بين لبنان ومصر وإن الطائفية اللي في لبنان مش زي اللي عندنا
وإن وإن
ماشي يا عم مش هنختلف بس رغم الفوارق دي فيه عوامل مشتركة
مش مصدق؟
ارجع بذاكرتك لسنة فاتت بس
وعد معانا كم الحوادث والاحتكاكات اللي حصلت بين المصريين المسلمين والمسيحيين
الـسى دى بتاع المسرحية إياها الاعتداء على كنيسة محرم بك الخناقة على الأرض عشان تتبني كنيسة أو مسجد
ولو رجعت لورا أكتر من أول أحداث الزاوية الحمرا عام 1979 هتكتشف أن بقالنا أكتر من ربع قرن واحنا مش مع بعض
هتكتشف إننا في أحيان كتير بنطبق علينا المثل إياه
أنا وأخويا على ابن عمي وأنا وابن عمي على الغريب
صحيح الموضوع ماوصلش لحرب أهلية زي اللي حصلت في لبنان
بس لاحظ برضه إنه استغرق وقت أكتر من اللي استغرقته الحرب الأهلية في لبنان
والمشكلة الأكبر إننا بننكر إن فيه مشكلة أصلا
وبنعمل نفسنا مش واخدين بالنا من إن فيه توتر بجد بين المسلمين والمسيحيين في مصر
وكمان بندخل في دايرة مفرغة ما بين مين اللي بدأ الأول
جرجس ولا عبد الله
ليه مانكونش دايما أنا وإنت وأخويا وأخوك وابن عمك دايما على الغريب مش أحيانا على الغريب وأحيانا كتيرة بنكون ضد بعضنا وعلى بعضنا؟
إيه اللي بيمنع ده؟
وليه بنكون صف واحد في الأزمات والحروب بس؟
ومانكونش كده طول الوقت؟
ما هو أخوك وصاحبك المسيحي ولا المسلم في وقت الحرب والشدة بيكون هو هواه برضه مسيحي أو مسلم في الأوقات العادية؟
حد يعرف يجاوب ???????
انا شايفك بتنهج من كتر القرايه .. مش مهم خد نفسك وجاوب